O blog Estricalla, creyau por o zaragozano Marco Antonio Joven Romero o 25 de chunio de 2006, plega de cumplir vente anyos d'actividat. Naixiu en plena epoca d'a blogosfera, o prochecto s'ha manteniu vivo mientras dos decadas como un espacio personal escrito en aragonés y como un testimonio singular d'a presencia d'ista luenga en internet.
Estricalla prencipió con una entrada titulada “Escomenzipiamos!”, en a que o suyo autor anunciaba a suya intención d'escribir en aragonés sobre luengas, ciencia, sociedat, esportes y atros temas d'interés. Vente anyos dimpués, o blog contina en activo y ha replegau más de 500 publicacions sobre viaches, cultura, vida cutiana, reflexión lingüistica y experiencias personals en esferents países.
O prochecto estió citau fa poco por RTVE Noticias como o blog más antigo en aragonés en activo. En un contexto en o que buena parti d'a creyación dichital s'ha esbarrau ent'os retz socials, Estricalla conserva antimás o valor d'archivo: dos decadas de textos continaus, accesibles y escritos dende una luenga minoritaria y menazada.
“Estricalla nunca no ye estau un prochecto institucional ni profesional, sino un espacio personal. Precisament por ixo alza valura: contrimuestra que l'aragonés puede servir ta charrar de cualsiquier cosa, no nomás d'a propia luenga, sino tamién de viaches, filosofía, literatura, ciudaz, remeranzas, sociedat u vida diaria”, sinyala Marco Antonio Joven Romero, autor d'o blog.
Mientras istas vente anyadas, Estricalla ha acompanyau a trayectoria vital y profesional d'o suyo autor en Aragón, Francia, Filipinas, Vietnam, Eslovaquia, Brasil, Canarias y Colombia. Ixa dimensión viachera ha convertiu o blog en un caso poco habitual: una finestra t'o mundo escrita dende l'aragonés, con textos sobre Manila, Hanói, Río de Janeiro, Kosice, Bogotá u os Pirineus, entre muitos atros puestos.
L'aniversario plega en un momento especialment significativo t'a luenga aragonesa, a suya presencia dichital d'a que depende en gran mida d'iniciativas personals, asociativas y voluntarias. Frente a la fuchacidat d'os rez socials, Estricalla representa una traza de continidat: a d'una voz individual que ha remaniu a lo largo de vente anyos una practica cutiana d'escritura en aragonés.
Marco Antonio Joven Romero ye aragonés, de Zaragoza, doctor en Filosofía, doctor en Filolochía y graduau en Matematicas. Ha treballau como docent y investigador en Aragón, Espanya, Francia, Filipinas, Vietnam, Eslovaquia y Colombia, y ha desembolicau parti d'a suya trayectoria academica y personal arredol d'as luengas, a cultura y a escritura.
