Espiello, lo Festival internacional de documental etnográfico de Sobrarbe, convoca los premios Agora x l’aragonés. Uns premios que plegan a la suya VIII edición y que buscan los millors treballos de 2024 realizaus, doblaus u subtitulados en aragonés. Lo plazo de presentación d'inscripcions finalizará lo 30 de chinero de 2025 y habrá de realizar-se a traviés d'o formulario d'inscripción en a web www.espiello.com.
Este premio naixió con l'obchectivo de difundir lo patrimonio lingüistico aragonés. Asinas l'explica Patricia Español, directora de Espiello, pa remarcar que "naixen pensaus pa difundir lo patrimonio lingüistico aragonés y fomentar la creyación audiovisual en luenga aragonesa, asinas como dar visibilidat y difusión a los treballos realizaus". En a primera edición "no existiba garra premio ni reconoixencia pa la creyación en aragonés en formato audiovisual, tan important en a nuestra sociedat actual y pensamos que lo nuestro festival, Espiello, yera un espacio ideyal pa promover lo suyo conoixencia y conservación entre los vecins de Sobrarbe, pero tamién dignificar y dar visibilidat a esta luenga minoritaria a libel internacional, a causa d'a multiple procedencia de participants, churau, publico, convidaus".
Lo Premio Espiello Agora x l’aragonés conta con dos categorías, la cheneral, dotada con 900 euros y trofeo pa lo millor audiovisual en aragonés; y la categoría escolar, dotada con una experiencia ludico-educativa educativa relacionada con o cine y l'aragonés y valorada en 500 euros y trofeo. En esta zaguera categoría pueden participar escolars de toz los ciclos, dende infantil a centros de adultos, pasando per la educación primaria y secundaria.
"Un d'os alicientes d'este premio ye que estes treballos puedan veyer-se en a pantalla d'un cine. Pa ixo organizamos una gala d'entrega de premios, con a presentación y la mosica en directo en aragonés", detalla Español.
Estes premios naixioron d'a man d'o departamento de Politica Lingüistica d'o Gubierno d'Aragón y dende l'anyo pasau s'organizan con la Dirección Cheneral de Patrimonio. Este anyo s'incorpora l'Academia d'a Luenga Aragonesa que exerce labors de asesoría lingüistica y formará parte d'o churau d'os premios.
En as edicions anteriors han participau 88 treballos tanto de l'ambito escolar, como produccions profesionals y cintas realizadas per aficionaus, muitas d'ellas motivadas per estes premios, "un buen numero si consideramos que ye una luenga minoritaria", anyade Patricia Español, per lo que s'ha aconseguiu l'obchectivo con o cual naixió este concurso.
Espiello conta con dos competicions u concursos: una internacional de documental etnográfico y esta aragonesa d'audiovisual realizau en aragonés que contan con convocatorias diferenciadas. Totas dos s'incluyen en o festival internacional, que la suya XXII edición se celebrará en Boltaña d'o 28 de marzo a lo 6 d'abril de 2025.
