Coincidindo con o Día d'a Luenga Materna, que se celebra lo 21 de febrero, Espiello da a conoixer los detalles d'a VIII edición d'os premios Agora x l’aragonés, que se convocan en o marco d'o Festival internacional de documental etnográfico de Sobrarbe.
Agora x l’aragonés premia los millors treballos audiovisuals d'o zaguer anyo gravaus, doblaus u subtitulados en aragonés. Conta con dos categorías, la cheneral y la escolar y en esta edición s'han presentau un total de ueito treballos. Tres en a categoría escolar: "Adevinetas", que plega d'o colechio Salesiano de Uesca; "Monzón noticias", de l'Asociación Querím; y "O viache d’os gorrorrois", d'o CEIP Montecorona de Samianigo.
Y cinco documentals u treballos presentaus a la categoría cheneral: "Ixigoleta y Bordón", de Silvia Orós; "A tierra que somos: un vuelo sobre as nuestras radizes", d'Ana Constante y Daniel García; "Cuan lo mon cambia", de Carmen Castán y Javier Moreno; "Baitico, l’ombre-libro de la valle de Bielsa", de Luis Miguel Bajén; y "Tiedas de San Chuan", de Roberto Serrano.
Lo churau en esta edición ye componiu per Fernando Romanos, doctor en lingüistica hispanica y master en luengas aplicadas; miembro de Nogará y autor de diversos treballos d'investigación y libros escritos en aragonés; Juan Pablo Martínez, catedrático de Teoría d'o Sinyal y Comunicacions d'a Universidat de Zaragoza, y academico de numero de l'Academia Aragonesa d'a Luenga, estando lo suyo actual secretario, amás d'autor de diversos treballos sobre la situación de l'aragonés; y Lola Gracia, qui tiene un largo recorriu profesional en o campo d'a información y la documentación, desenvolvendo labors de bibliotecaria, archivera y documentalista tanto en l'administración publica, como en a interpresa privada. En 2011 endrezó y engueró "Cosetas d’adentro" y posteriorment "Luz de septiembre" premiada tanto en Espiello como en os Premios Simón d'o Cine Aragonés en 2024.
Las obras premiadas d'a edición 2025 de Agora x l’aragonés se conoixerán en una gala que se celebrará lo proximo 22 de marzo, en o palacio de congresos de Boltaña. A las 16:30 horas se prochectarán los treballos presentaus a la categoría escolar. A las 17:00 horas se podrán veyer los treballos d'a categoría cheneral. Y a las 19:45 horas prencipiará la gala d'entrega de premios, conducida per la presentadora y directora de Charrín-Charrán, lo primer programa d'Aragón TV en luenga aragonesa, Silvia Cebolla, y amenizada per Idoipe, músico aragonés protagonista d'o documental que en a pasada edición de Espiello s'alzó con o premio d'o publico “Tañen furo”.
Los premios rozan los 1.500 euros. En a categoría cheneral, lo premio ye dotau con 900 euros y trofeo pa lo millor audiovisual en aragonés realizau entre l'anyo 2024. En a categoría escolar, lo premio ye dotau con una experiencia ludico-educativa valorada en 500 euros y trofeo. Este premio se concibe como una actividat educativa relacionada con o cine y l'aragonés y la cultura aragonesa y se reconoixe a lo millor audiovisual en aragonés realizau entre l'anyo 2024 per escolars d'educación infantil primaria, secundaria y educación de adultos. Esta ye una d'as actividaz previas a lo concurso internacional de Espiello, que se celebrará d'o 28 de marzo a lo 6 d'abril en Boltaña, organizau per la Comarca de Sobrarbe.
