Nueu sindicatos asturianos (CCOO, CGT, CNT, CT, CSI, INAST, Sindicatu Asturianu LCT, UGT y USO) enchegan una nueva iniciativa unitaria pa aconseguir la libertat plena de ‘Las 6 d'A Suiza’, las sindicalistas engarcholadas per lo simple exercicio d'os suyos dreitos sindicals.
Una campanya de solidaridat internacional con ‘Las 6 d'A Suiza’, per medio d'una pachina web en a plataforma de mobilización dichital Avaaz, con a cuala replegarán sinyaturas de toz exichindo a lo Gubierno d'o Estau espanyol un indulto “como sola forma posible ya pa facilitar la libertat plena d'as seis sindicalistas presas”, sinyalan.
Lo prestichioso churista José Antonio Martín Pallín, machistrau emerito d'o Tribunal Supremo, ha asumiu estar lo primer firmante d'esta campanya internacional, aportando mesmo un video en o cual explica las razons per las cualas ‘Las 6 d'A Suiza’ nunca deberían haber ingresau en a garchola.
El sindicalismo asturiano inicia una campaña internacional de firmas por la libertad de Las 6 de La Suiza, presas por ejercer sus derechos sindicales.
Martín Pallín, magistrado emérito del Tribunal Supremo, es el primer firmante.
FIRMA Y DIFUNDEhttps://t.co/tJHFBA35ch pic.twitter.com/ecrP9BsrNz— 6 de la Suiza (@6delaSuiza) September 29, 2025
“Cosa chustifica que un Estau, pretendidamente moderno y democratico, tienga engarcholadas a seis personas per desfender los dreitos laborals d'una treballadora, lo suyo embarazo y lo suyo dreito a la salut”, recalcan.
En a campanya que encietan los sindicatos se denuncia “lo complot policial y chudicial, prencipiau en 2017, que consiguió una sentencia en a cuala se diz que demandar negociación sindical ye un delito d'obstrucción a la chusticia, y que convocar concentracions sindicals ye un delito de coaccions”.
‘Las 6 d'A Suiza’ estioron denunciadas “mas de 30 vegadas y dos d'ellas estioron detenidas irregularment. Dimpués de ueito anyos de procesos chudicials, levan ya cuasi tres meses de prisión y la suya condena ye de tres anyos y meyo. Actualment s'haigan en tercer grau d'o rechimen penitenciario, pero siguen complindo la suya condena y son sozmetidas a prisión”, aseveran.
Finalment, recuerdan que “vintidos sindicatos d'o Estau espanyol ya presentoron una petición de indulto. Amnistía Internacional solicitó lo mesmo”. Agora lo sindicalismo asturiano encieta una campanya internacional de sinyaturas “pa pedir-le a lo gubierno la tramitación urchent d'ixe indulto”, concluyen dende lo grupo ‘Sofitu a Les 6 de La Suiza’, recordando o lema “Yo tamién soi d'as 6 d'A Suiza”.
