Tot prencipió en 2017, cuan una treballadora embrazada d'a pastelería ‘La Suiza’, ubicada en Xixón -Asturies-, denunció explotación, impago d'horas extras y acoso sexual. La CNT emparó la causa y convocó concentracions pacificas frent a lo local. Las protestas contoron con a participación de decenas de personas (en ocasions mas d'un centenar) sin incidentes destacables.
En 2021, lo chuez Lino Rubio, d'o Chudgau nº 1 de Xixón, condenó a las seis sindicalistas asturianas —cinco mullers y un hombre— per “coacción grieu” y “obstrucción a l'administración de chusticia”, imposando-les tres anyos y meyo de prisión. L'Audiencia d’Asturies y lo Tribunal Supremo ratificoron la condena. Lo chuez Rubio, considerau “severo” y “con sesgo ideolochico” en casos de protesta laboral y social, ignoró lo criterio d'a Fiscalía, que s'amostró a favor de suspender la pena.
La criminalización d'o sindicalismo
Organizacions sindicals y socials coinciden que la sentencia suposa una “criminalización de l'acción sindical”. La Plataforma Abogacía Defensa de l'Acción Sindical lo cualificó como un “exercicio de dreito penal inquisitivo y vengativo”, sinyalando que sentencias anteriors permitiban actuacions semellants sin cayer baixo esta acusación.
La antorchada en Sant Xuan, organizada per colectivos afíns en Xixón, reunió a 200 personas iluminando con bengalas lo paseo marítimo como simbolo de resistencia. Y lo 29 de chunyo mas de 8.000 personas se manifestoron en Xixón, convocadas per CNT, denunciando “l'alianza retrograda de poders policials, chudicials, empresarials y mediaticos”.
Dende Aragón: solidaridat y unidat de clase
La convocatoria de CNT Zaragoza pa este domingo ye un cenyo de contundent repulsa. Secundan la concentración diversas organizacions, como CGT, OSTA, CCOO, UGT, CUT, IA, ISTA, SOA, PCE, PCTE, tamién “Los 6 de Zaragoza” y numerosos colectivos socials. Esta plevida de apoyos obedeixe a que no se trata d'un caso aislau: se percibe como parte d'una estratechia sistematica de represión contra la protesta.
Ya l'anyo pasau, en Uesca, Teruel y Zaragoza, mas d'una veintena d'organizacions ya protagonizaron concentracions y manifestacions semellants baixo lo lema “Fer sindicalismo no ye delito”. Lo nuestro país mantiene asinas una linia firme de solidaridat intenacionalista y de clase, no nomás con as seis sindicalistas arrestadas, sino con o sindicalismo combativo en o suyo conchunto.
Qué ye en chuego?
Lo dreito a la protesta: si accions pacificas como charrar frent a lo local d'una interpresa per causas laborals son consideradas “coacción” u “obstrucción chudicial”, s'ubre una periglosa vía pa limitar la protesta social.
Precedente chudicial: l'endurimiento d'a protección d'a honor empresarial frent a la libertat sindical ha estau criticau per avogaus que lo comparan con sistemas autoritarios.
Represión y espanto: seis sindicalistas engarcholadas ninvian un mensache intimidatorio a atros activistas, con o risgo de inhibir la mobilización colectiva, como en o caso d'os seis de Zaragoza.
A l'aspera de l'anunciau indulto
Las seis ya empecipioron a complir condena lo 10 de chulio en a garchola de Villabona, con emparo familiar y presión pa aconseguir lo tercer grau. La CNT y lo gubierno asturiano han pediu lo indulto, tamién la vicepresidenta esapanyola Yolanda Díaz lo refirma, encara que la familia del empresario anuncia que de producir-se lo recurrirá debant d'o Tribunal Supremo.
Este domingo, Zaragoza, la capital d'o país. se suma a la ola de protestas. La concentración busca no nomás visibilizar la conchuntura, sino tamién construyir una defensa colectiva d'o dreito a l'acción sindical. La CNT y lo conchunto d'a izquierda sindicalista reclaman que esta chornada no sía “una mas”, sino lo comienzo d'una ofensiva social y churidica contra lo que consideran un retroceso en dreitos fundamentals.
La lei Mordaza: lo Estau contra lo Pueblo organizau
Este caso no trata nomás d'una disputa entre una pastelería y unas activistas, simboliza lo pulso entre lo Estau y la patronal contra una sociedat que exiche dignidat laboral. En un inte en que la precariedat, la brecha salarial de chenero y la perdida de dreitos laborals aumentan, frenar la represión contra lo sindicalismo no ye una opción: ye un imperativo democratico.
