Lo grupo local d'Amnistía Internacional en Uesca, convocó lo pasau mierques 23 de chulio un acto d'emparo a los seis de Zaragoza en a plaza Concepción Arenal que reunió a mas d'un centenar de ciudadans y ciudadanas.
Una vegada mas, a traviés de postals que se le han ninviau, se tornó a pedir a lo ministro Bolaños lo indulto pa los chóvens que son complindo condena de cuatro anyos de prisión, per haber participau en una protesta contra un mitin de Vox celebrau en chinero de 2019 en o Auditorio de Zaragoza. Tamién se replegoron escritos de ánimo, carinyo y solidaridat pa los propios chóvens que son complindo condena en a garchola de Zuera.
La sentencia condemnatoria a los seis de Zaragoza se basó exclusivament en os testimonios de seis achents policials. Garra d'os tres tribunals, que analisoron lo caso, podió acreditar que los chóvens condenaus participasen en os actos concretos de protesta en os cuals se causasen danyos a vehíclos y lesions a policías.
Dende Amnistía Internacional Aragón recuerdan que la protesta “ye un dreito imprescindible en una sociedat libre y democratica”, y per ixo, piden “que s'anule la suya condena y que se reforme lo codigo penal pa que no se pueda seguir criminalizando este dreito fundamental”.
“Recordamos que esta mesma semana s'ha conoixiu una nueva condena economica pa los seis de Zaragoza de 140.000 euros pa indemnizar a un policía que participó en o dispositivo policial d'a manifestación de 2019 que provocó las detencions”, recalcan dende Amnistía Internacional Aragón.
“Esta cifra se suma a atros 40.000 euros ya conoixius anteriorment en concepto de pinyoras y responsabilidat civil que, de conchunta con as costas d'o chudicio elevan per alto d'os 200.000 euros la cantidat a la cuala habrán de fer frent los condenaus. La plataforma d'emparo a estes chóvens ha habilitau de nuevo una cuenta bancaria en a suya web pa replegar nuevas donacions que aduyen a afrontar estes gastos”, concluyen.
Tot sobre la campanya per la libertat d'os seis de Zaragoza. Mas información d'a plataforma y d'o caso en libertad6dezaragoza.info.
