Dende Ecolochistas en Acción sinyalan que “vivimos tiempos de grans desafíos. Entre que l'achenda internacional ye protagonizada per lo chenocidio d'o Pueblo palestino, per las medidas d'o president d'EUA, Donald Trump, la devastadora guerra per lo control d'os recursos en a Republica Democratica d'o Congo -que lo suyo orichen se remonta a lo expolio colonial-, la persecución de pueblos orichinarios -como lo pueblo mapuche- y l'abance d'a ultraderecha -que mete en o punto de mira a las personas migrants y habitants d'o sud global, mullers u personas LGTBIQ+- en o nuestro territorio tamién vivimos momentos convulsos”.
Muitas organizacions, entre ellas Ecolochistas en Acción, han denunciau “los discursos d'odio, la violencia racista y la islamofobia, asinas como las condicions d'explotación laboral -especialment de personas migrants- que se suman a las denuncias de cualques colectivos per agresions sexuals y explotación sexual. Tamién nos han sacudido las noticias d'agresions sexuals en diferents ambitos, dende la politica y lo esporte, incluyius los nuestros propios entornos activistas”.
Lo feminismo ha estau capaz de librar verdaderas revolucions
Frent a tot ixo “luen de paralizarnos, actuamos. Sabemos que lo feminismo ha estau capaz de librar verdaderas revolucions dende la desobediencia civil, l'acción pacifica, l'internacionalismo, la sororidad y lo treballo en ret. Somos comprometidas con o movimiento feminista, autonomo y diverso, per la equidad y contra la discriminación per razons de chenero, identidat y orientación sexual”, enfatizan dende Ecolochistas en Acción.
Per ixo, este 8M de 2025, Ecolochistas en Acción se reafirma “como ecofeministas, fendo nuestro lo lema d'as companyeras d'o sud global: “Ni la tierra ni los nuestros cuerpos son territorio de conquista”.
Con esta ideya compartida “queremos decir que lo nuestro territorio ye conformau per lo espacio fisico y simbolico en o cual desenvolvemos las nuestras vidas en relación con a resta de personas y d'o mundo vivo, y que lo nuestro primer territorio habitau ye lo nuestro propio cuerpo. Per ixo exichimos que sía tratau con respecto y dignidat. Ni los cuerpos d'as mullers ni los territorios son propiedat exclusiva de dengún, sino espacios d'autonomía, de creyación y cuidau de vida, de luita y de reivindicación”.
Asinasmesmo, aseveran “que las relacions d'opresión sobre la naturaleza tienen la mesma radiz que la opresión contra las mullers. Sabemos que lo sistema neoliberal se sustenta en guerras extractivistas, que lo capitalismo y lo patriarcado son depredadors, que lo suyo fin ye apropiar-se d'os recursos naturals menguantes d'a planeta y aniquilar las formas de vida y culturas locals en o sud y en o norte globals, y que amaga sistematicament los espacios y a las personas que sostienen la vida, despoja a los pueblos, destruye territorios y criminaliza las resistencias”.
“Tamién sabemos que la violencia contra las mullers ye universal: ocurre en toz los territorios habitaus y ye la violencia mas extendida en totas las sociedaz, tot y que desempenyamos los treballos de sustento y cuidau d'a humanidat y d'a resta d'o mundo vivo, encara que no siempre ye una opción triada”, enfatizan dende Ecolochistas en Acción.
Rebeldía y resistencia feminista
“Caminamos con a certeza de saber que as violencias que lo patriarcado exerce contra nusatras no serán pas un obstáculo pa frenar la nuestra rebeldía y la nuestra resistencia feminista. Esfendemos l'alegre rebeldía, y con ella este 8 de marzo: reivindicamos mas ecofeminismos perque garra vida vale menos que unatra”, recalcan.
En este sentiu, manifiestan lo suyo compromiso “con a igualdat y los dreitos humans d'as mullers diversas y las disidencias. Reiteramos que nomás dende una mirada ecofeminista podemos acabar con o sistema capitalista y patriarcal. Manifestamos la nuestra solidaridat con totas las mullers de toz los colectivos y entidaz. Convidamos a seguir luitando pa aconseguir organizacions libres de cualsequier violencia u discriminación. Y emparamos a las victimas d'agresions sexuals y de violencia contra las mullers, que somos cuasi totas y, especialment, a las mullers a las cualas estas agresions han acabau condicionando la vida y las cualas ni sisquiera pueden denunciar la violencia sufierta”.
Amás, reclaman “baixo estas premisas y en coherencia con os prencipios ideolochicos d'Ecolochistas en Acción, la igualdat de dreitos pa totas las personas”.
Las miradas ecofeministas sitúan las vidas dignas como una prioridat d'un contexto natural
Dende Ecolochistas en Acción tamién recuerdan que “las organizacions socials son fruto y reflecto d'as sociedaz an se crean, sociedaz sustentadas en estructuras, lechislacions, codigos de conducta y costumbres que s'han construyiu y se construyen dende lo patriarcado”. “La cultura y los comportamientos machistas se siguen (re)producindo, tot y con sieglos de luita feminista. Se cola en a nuestra traza de pensar, d'actuar y de relacionar-nos. La violencia organizativa ye una expresión mas d'o sistema en o cual hemos estau socializadas y en o cual vivimos, una violencia que discrimina y abusa d'as mullers y se manifiesta de variadas formas y en toz los ambitos. Probablement, garra organización se libre. La nuestra tampoco”, enfatizan dende la entidat ecolochista.
Ecolochistas en Acción “ye una entidat horizontal, con muita trayectoria de treballo contra las dinamicas y la desigual distribución d'o poder. Las mullers, y tamién muitos hombres, somos vichilants pa que la nuestra organización no se deteriore per dinamicas patriarcals adoptando actituz proactivas debant d'ellas pa identificar-las, no consentir-las y erradicarlas en zaguera instancia”, aseguran.
En tot este contexto global y local “complexo y incierto, las miradas ecofeministas son un lugar diferent dende lo cual mirar. Un lugar que sitúa las vidas dignas de totas las personas como una prioridat d'un contexto natural, que compartimos con a resta de seres vivos, y que se troban en un momento de contracción y cambio. Los ecofeminismos aportan analisis y propuestas imprescindibles pa que esta prioridat pueda materializarse”, aseveran.
Finalment, dende Ecolochistas en Acción convidan “a las personas feministas y ecofeministas d'o Estau espanyol a celebrar chuntas los nuestros dreitos este 8M, Día Internacional d'as Mullers”.
Más arredol d'o 8M en este especial.
