En 1976, un anyo antes que Síle Darragh dentrase en a garchola de Armagh –la sola prisión pa mullers en o norte d'Irlanda entre lo conflicto–, lo Gubierno britanico denegó lo estatus de preso politico a toz los prisioneros y prisioneras de l'IRA condenaus a partir de 1975. La decisión formaba parte d'una politica de criminalización d'os presos y presas y, per tanto, de l'IRA y d'a propia luita republicana. Alavez prencipioron las protestas a favor d'o estatus: primero estió la conoixida como protesta d'as mantas, y dimpués d'esta plegoron la protesta sucia y las huelgas de fambre.
Encara que las mayors protestas se realizoron en a prisión de Maze, conoixida como Long Kesh u H-Blocks (Bloques H), an yeran internaus los presos republicanos, las reivindicacions tamién tenioron gran repercusión en as presas de Armagh. Ellas tamién deixoron un important sinyal en aquella luita, una experiencia que dica agora heba estau practicament amagada. "John Lennon ha muerto" ye un relato, tanto personal como colectivo, d'a resistencia d'as presas republicanas a zaguers d'o decenio de 1970 y prencipios d'a de 1980. Una mirada diferent a la luita d'os presos y presas de l'IRA.
Lo libro estió publicau per primera vegada en 2011, con un prólogo de Gerry Adams, expresidente d'o Sinn Féin, y la segunda edición, de 2022, que la editorial Txalaparta publica agora en castellán, conta tamién con un prólogo de Rita O’Hare, antiga presa en Armagh y Limerick y representant d'o Sinn Féin en Estaus Unius; un epílogo de Mairéad Farrell, deputada d'o Sinn Féin; y una conversación, d'octubre de 2021, con cuatro antigas companyeras d'a garchola de Armagh: Anne-Marie Quinn, Sinéad Moore, Mary Doyle y la propia Síle Darragh.
En "John Lennon ha muerto" Darragh ofreix una cronica excepcional d'o día a día en aquella prisión: describe las terribles condicions que suportaban, lo mal tracto que recibiban y la dureza anyadida que suposaba fer frent a una protesta d'ixe tipo entre reixas. Pero tamién retrata la camaradería que existiba entre las companyeras, las estratechias que elaboraban y la humor con o cual sobrellevaban la suya situación. Perque, como afirma Rita O’Hare, estioron “mullers normals y corrients que s'enfrontinoron a retos extraordinarios en tiempos extraordinarios”. Tot ixo, narrau con gran ironía y sensibilidat. Seguntes Gerry Adams, se trata de “la millor descripción dica la calendata de l'ambient, las emocions y lo sufrimiento que experimentoron y suportoron las mullers d'a garchola de Armagh entre 1976 y 1981”.
Este libro sirve tamién, como subraya en o prólogo O’Hare, feneixida en marzo de 2023, pa compensar lo desequilibrio present en a historia d'as garcholas irlandesas, que, per diversas razons, s'ha centrau en las protestas d'os Bloques H, en as cualas diez republicans murioron entre la huelga de fambre de 1981. “Las mullers siempre s'han implicau en la luita per la independencia d'Irlanda. La suya labor nunca s'ha reconoixiu u atestiguado pro y per ixo ye tan important l'intenso relato de Síle Darragh”, remarca O’Hare.
Presentacions y coloquios en Iruñea y Zaragoza
De viache per Euskal Herria y Aragón, Síle Darragh presentó lo suyo libro en Iruñea, este mierques, en a siede de Txalaparta, y lo chueves en Zaragoza, en o Salón d'actos d'o Museo Pablo Gargallo. En totas dos citas ha estau acompanyada per Enrique Alda (traductor d'o libro a lo castellán). En Zaragoza, amás, participó en o coloquio Pedro Santisteve, avogau y activista.
Junto a Síle Darragh participan en el coloquio Enrique Alda (traductor de la edición de @txalapartatik) y @PedroSantisteve que recuerda que en el Estado español hay presos políticos como @javitxuaijon y llama a manifestarse de nuevo en Zaragoza el 26 de octubre por @Libertad6Zgz pic.twitter.com/LgvZGdrpBj
— Iker G. Izagirre (@igoiz17) October 3, 2024
