La institución d'o Chusticia d'Aragón tiene competencias especificas en materia lingüistica atribuyidas per l'articlo 19 d'a vichent Lei de luengas. En concreto, lo precepto aludiu estableix que lo Justiciazgo veilará per la protección d'os dreitos lingüisticos y per la supervisión d'as actuacions d'os poders publicos sobre este particular.
Como consecuencia d'a queixa presentada en o mes de febrero d'este anyo per Rolde de Estudios Aragoneses, Consello d’a Fabla Aragonesa, Institut d’Estudis del Baix Cinca y Associació Cultural del Matarranya, en a cuala meteban de manifiesto l'incomplimiento per l'actual Gubierno d'Aragón de Jorge Azcón (PP-Vox-PAR) de l'ordenau per lo Estatuto d'Autonomía d'Aragón, la Constitución espanyola y la Carta Europea d'as Luengas, eliminando a Dirección Cheneral de Politica Lingüistica y totas las linias existents pa la promoción y difusión de l'aragonés y lo catalán d'Aragón –premios literarios, cátedra en a Universidat de Zaragoza, convenios con comarcas y concellos, Academia Aragonesa d'a Luenga, subvencions a asociacions–, la Chusticia d'Aragón ha emitiu una sucherencia a lo Gubierno d'Aragón a fin que cumpla los preceptos legals que "replegan tota una serie de linias d'actuación relacionadas con o patrimonio lingüistico aragonés; preceptos que, per tanto, l'Administración d'a Comunidat Autonoma d'Aragón habría de prener en consideración en materia de politica lingüistica".
Asinas la Chusticia se refiere a preceptos como los referius a los dreitos lingüisticos (art.3), a la dignificación d'as luengas y modalidaz lingüisticas propias (art. 4), a l'Academia Aragonesa d'a Luenga (art. 7), a la conservación d'o patrimonio lingüistico aragonés (art. 9), a la difusión d'o patrimonio lingüistico aragonés (art. 10), a la promoción cultural de luengas y modalidaz lingüisticas propias (art. 11), a la ensenyanza d'as luengas propias (arts. 12 a 15), a la iniciativa social (art. 25), u a la politica de cooperación entre l'Administración autonomica y entidaz que puedan contribuyir a lo complimiento d'as fins previstas en esta Lei (disposición adicional segunda).
A la suya vegada, recuerda que este compromiso d'as administracions publicas per la protección y promoción d'as luengas y modalidaz lingüisticas propias, "se replega en a Carta Europea d'as Luengas Rechionals u Minoritarias, de 1992. Sin ixuplidar que la propia Constitución espanyola de 1978, en o suyo articlo 3.3, estableix que las distintas modalidaz lingüisticas constituyen un elemento basico d'o patrimonio cultural y que, per tanto, han d'estar obchecto d'especial respecto y protección".
Amás, la Chusticia mete de manifiesto que la propia lechislación obliga a lo Gubierno d'Aragón a establir partidas pa levar a cabo esta protección, promoción y difusión. "Resulta oportuno sinyalar que, pa la enchegada d'as actuacions endrezadas a la protección y promoción d'as luengas y modalidaz lingüisticas d'Aragón, se preveye que l'administración destine las partidas presupuestarias oportunas pa la consecución de tals fins; consignación presupuestaria que, en concreto, amaneixe regulada en a disposición adicional cuarta d'a Lei 3/2013 en establir que 'lo Gubierno d'Aragón consignará las partidas presupuestarias necesarias pa la mesa en marcha d'a present Lei".
Plegaus a este punto, la Chusticia sinyala que "culle colegir que existen previsions legals que habrían d'estar presas en consideración per lo Gubierno d'Aragón en l'exercicio d'as suyas competencias en materia de politica lingüistica, y, per tanto, en a implementación de politicas publicas en esta materia". La Chusticia da un plazo d'un mes a lo Gubierno pa comunicar si accepta u no la sucherencia, indicando en caso negativo las razons per las cualas no lo faiga.
Cal recordar, que dimpués d'a proposición de lei rechistrada per l'ultraderechista Vox en as Corz d'Aragón, "con a finalidat d'eliminar l'aragonés y lo catalán d'Aragón como luengas propias", l'asociación cultural Rolde de Estudios Aragoneses lanzó una replegada de sinyaturas pa mantener la protección legal d'as nuestras luengas. Una campanya que ha sumau amán de 7.000 apoyos.
