Las dos primeras intervencions se realizoron lo pasau 13 de febrero, en o quirófano d'o Hospital que l'exercito de tierra tiene conveniado en Zaragoza con o Salud aragonés, a dos pacients a qui se les efectuó un implante con o sistema Eterna pa la estimulación medular. As operacions las facioron los neurocirurchans d'o Hospital Universitario Miguel Servet d'a capital d'o país, Carlos Fuentes Uliaque y Juan A. Alberdi Viñas.
Dende ixa calendata, s'han implantau atros dos dispositivos mas. Las intervencions s'han levau a cabo, una en o Servet y unatra, esta mesma semana, en o mesmo Hospital conveniado.
La prevalencia d'o dolor cronico s'ha disparau en os zaguers anyos dica afectar en estes momentos a lo 27% d'a población adulta. Represienta lo primer motivo de consulta medica y suposa un coste de mas d'o 2,5% d'o PIB en o Estau espanyol.
La estimulación medular ha estau recomendada per los equipos medicos entre mas de 50 anyos pa aduyar a las personas a controlar lo dolor cronico y amillorar la suya calidat de vida. Los dispositivos que s'utilizan se componen d'uns cables delgaus (electrodos) colocaus sobre la médula espinal que, chunto a una chicota batería (generador), colocada debaixo d'a piel, aduya a interrumpir las sinyals de dolor antes que puedan plegar a lo celebro.
Este nuevo dispositivo, que s'ha implantau per primera vegada en Europa representa una important millora sobre los cuals se colocaban dica lo momento. “Ye lo sistema recargable mas chicot d'o mercau, con una terapia clinicament prebada con resultaus superiors a la estimulación medular convencional“, ha explicau lo neurocirurchan d'o Hospital Universitario Miguel Servet, Carlos Fuentes Uliaque, un d'os dos especialistas que ha realizau estes dos implantes, de conchunta con o tamién neurocirurchan Juan A. Alberdi Viñas.
Millor mantenimiento
Este dispositivo presenta un menor perfil de mantenimiento, ya que se recarga nomás cinco vegadas a l'anyo, a diferencia d'atros en os cuals cal fer-lo semanalment u a diario.
Este nuevo sistema d'estimulación ofreix, amás, una serie d'avantallas pa la comodidat de clinico y pacient, dende la compatibilidat con una resonancia magnetica, dica disposar d'una tecnolochía intuitiva. Mesmo tiene la posibilidat que en un futuro pueda fer-se la programación en remoto pa realizar la modificación d'a terapia de forma telematica, dende lo propio domicilio d'o pacient con connexión a internet, sin necesidat que haiga d'acudir a la consulta.
“Esto no nomás abaratirá costes de desplazamiento y meyos tecnicos y humans, como los destinaus a ambulancias u tecnicos, sino que amillorará as condicions d'o propio pacient en disminuyir los inconvenients que suposan haber d'acudir muitas mas vegadas a lo centro hospitalario, especialment en o caso d'as personas que viven en zonas cheograficas de difícil acceso“, ha anyadiu lo doctor Carlos Fuentes Uliaque.
La recuperación d'os y las pacients a los cuals se les colocan los dispositivos d'estimulación medular pa dolor cronico ye muito rapida dimpués d'a intervención, “encara que dimpués d'a operación puede pasar un tiempo dica que s'aconsigue obtener lo mayor provecho posible a la terapia“, ha indicau Carlos Fuentes Uliaque.
