En esta ocasión, lo calandario "mete en valor a inchenieras y arquitectas de toz", y la adenda aragonesa replega ilustracions de Mónica Muñoz Montejano "de ueito arquitectas y inchenieras d'a nuestra tierra". "Lo feminismo ye una seña d'identidat d'o modelo sindical d'os seis sindicatos que conforman ISTA", subrayan en una nota de prensa.
En Aragón se distribuyirán 5.000 calandarios per tot arreu de tota la suya cheografía, en puestos tan diversos como la planta automobilistica de Figueruelas, hespitals de tot lo país y siedes de l'Administración Publica.
Como resaltan dende lo sindicato d'a ensenyanza de ISTA "no ye un simple almanaque, ye un material didactico y feminista, replega propuestas pedagochicas en as suyas zagueras pachinas". En edicions anteriors s'ha dedicau a mullers en a ciencia, escritoras, mosicas, esportistas, creyadoras d'opinión, exploradoras y aventureras, cineastas, creyadoras de cambios socials, etcetera. En a web d'a Organización de Mullers se pueden trobar totas las edicions anteriors con as suyas propuestas didacticas.
Adicionalment, lo calandario coeducativo 2024 ha estau editau en diferents luengas, incluyiu l'aragonés, como "contribución" per parte d'o sindicato "a lo reforzamiento d'una luenga considerada en periglo d'extinción per la UNESCO".
En a presentación han participau las arquitectas Sonia Álvaro, Esther Arilla y Lucia Pérez Moreno, amás d'as inchenieras Patricia Heredia y Pepa Pardo, que son cinco d'as ueito arquitectas y inchenieras civils resaltadas con una ilustración de Mónica Muñoz en a adenda aragonesa a lo calandario coeducativo. Amás Pepa Pardo tamién amaneixe en o calandario editau pa la suya distribución en tot lo país, protagonizando la ilustración d'o mes de setiembre, estando la segunda aragonesa en amaneixer con una ilustración en dito almanaque, la primera estió Teresa Perales en o calandario dedicau a las mullers en o esporte.
En a suya primera impresión s'ha feito una tirada de 65.000 eixemplars pa distribuyir per los distintos territorios d'o Estau espanyol, en o momento present se ye realizando una segunda tirada con o que se superasen los 100.000 eixemplars en a edición de 2024. Las personas asistents a l'acto han estau obsequiadas per parte de ISTA con un calandario y una adenda.
