Dimpués de dos anyos y meyo d'intensa actividat en a suya canal ‘Eugenio Monesma - Documentales’, la plataforma de videos d'a multinacional estadounidense Google, Youtube, ha reconoixiu a Eugenio Monesma con o Botón d'Oro. Una reconoixencia especial que esta plataforma dichital otorga a los creyadors y creyadoras de conteniu que aconsiguen lo hito d'un millón de suscripcions en as suyas canals. Una muestra d'o refirme y l'admiración d'una comunidat en constant creiximiento que aprecia y desfruta d'o conteniu proporcionau per lo creyador aragonés. “Quí m'iba a decir que me convertiría en youtuber a los 71 anyos”, afirma sorprendiu Monesma.
Queso artesanal, filau d'a lana, caseta de adobe, miel tradicional u peines con cuernos d'animals son beluns d'os suyos videos que ya superan los mas de cuatro y nueu millons de visualizacions, chunto a atros 400 documentals que conforman la extensa colección ya publicada en a suya canal sobre labors y oficios d'as zonas rurals d'a Peninsula Iberica, muitos d'éls ya desapareixius.
Con mas de 40 anyos a las suyas espaldas en o sector d'o cine etnográfico, Eugenio Monesma conta actualment con mas de tres millons de seguidores entre toz los suyos rez socials. Lo suyo conteniu sobre las costumbres y tradicions d'os lugars s'han viralizado per toz os rincones d'o planeta gracias a los subtítulos disponibles en mas de 18 idiomas, plegando con gran exito a America, de norte a sud. “Nunca imachiné que los documentals que gravé en os anyos 90 en as zonas rurals d'Aragón, y de muitos lugars d'Espanya, iban a estar vistos per millons de personas en países como Estaus Unius, Mexico u India”, declara lo cineasta.
Monesma ha sabiu establir un vinclo soliu con a suya audiencia, ofrindo-les un conteniu unico y de calidat. Los suyos seguidores y seguidoras encara tienen conteniu pa rato, ya que conta encara con mas de 1.000 documentals en o suyo fichero pa publicar semanalment en a suya canal ‘Eugenio Monesma - Documentales’.
“Cada día respondo cientos de comentarios positivos que deixan los seguidores en os míos videos de Youtube, y una d'as suyas preocupacions ye que luego se rematen los documentals. Tranquilos perque encara tiengo muito material”, asegura Monesma.
Lo legado y lo treballo d'os protagonistas perdurará en cada documental que comparte, y lo suyo impacto en a preservación d'as radices culturals y la memoria colectiva ye invaluable.
Eugenio Monesma, lo cine per y pa la cultura tradicional
Eugenio Monesma Moliner, naixiu en Uesca en noviembre de 1952, ye un director y productor de cine etnográfico, conoixiu per las suyas series de documentals sobre costumbres, oficios perdius, y tradicions de diferents partes d'Aragón y d'a Peninsula Iberica. Conta con o fichero audiovisual (mas de 3.000 documentals) y fotografico (milars de diapositivas y fotografías dichitals) mas gran sobre cultura tradicional d'o Estau espanyol.
Perteneixe a la Real Academia d'as Nobles y Bellas Artes de Sant Luis de Zaragoza, a l'Instituto Aragonés d'Antropolochía, y a l'Asociación Espanyola de Cine Cientifico (ASECIC). A lo largo d'os suyos 40 anyos de trayectoria profesional ha recibiu mas de 150 premios y reconoixencias a nivel nacional, estatal y internacional, entre los cuals destacan lo Premio Simón de Cine Aragonés 2022, la Medalla a lo Mérito Cultural per lo Gubierno d'Aragón y lo Premio Félix de Azara, entre atros.
Los suyos documentals sobre ‘Oficios Perdius’ s'han emitiu en TVE, La2, Canal Historia y Aragón Televisión, y actualment cuenta en Canal Cocina con o programa mas lonchevo sobre gastronomía ‘Los Fogones Tradicionales’, con 23 temporadas en antena ininterrompidas. En a suya faceta como presentador ha presentau y endrezau lo programa ‘Nos veyemos en a plaza mayor’ entre 6 anyos en Aragón Televisión y ‘Los Secretos d'as piedras’ y ‘Radices Vivas’, tamién en Aragón Televisión.
