Lo Geolodía ye una iniciativa de divulgación y amanamiento d'a cheolochía y d'a profesión de cheóloga a la sociedat. L'actividat ye totalment gratuita, ubierta a totz los publicos y consiste en una salida cheolochica de campo guiada per cheólogos y cheólogas en a quala se realizan aturadas con explicacions scientificas de l'entorno d'a excursión.
Este anyo, as autenticas protagonistas d'o Geolodía serán ‘Los estanys d’Estanya: un aqüifero hidrocheolóchico karstico singular’. Se realizará un recorriu d'uns 3 km, que partirá de Estanya, en o qual se visitarán dos d'as lagunas que componen este complexo lagunar karstico. Lo punto final se situará tamién en Estanya. A traviés de cinco aturadas conoixeremos lo suyo orichen, la suya relación con os habitants d'a redolada y la suya aportación a lo conoixencia d'o clima local y nacional.
Pa asistir, simplament cal replenar lo formulario d'inscripción (aquí) y triar lo grupo y hora a la quala se quiere asistir. “Recordatz, set puntuals y desfrutatz d'este día dedicau a la cheolochía”, sinyalan dende a organización.
Asinas pues, lo día 7 de mayo se celebrará lo Geolodía en Estanya, y “podremos apreciar d'a man de cheólogos y cheólogas, lo patrimonio cheolochico tant important que i hai en Estanya. Nos desvelarán totz los secretos que entre millons d'anyos han iu creyando lo paisache actual y los recursos minerals que lo ser humano ha aprendiu a esclatar pa lo suyo beneficio”, recalcan.
“Lo recorriu consistirá en una rota circular d'uns 3 km de longaria, con un desnivel de 50 metros a traviés de senderos y camins de tierra con un grau de dificultat moderau. S'estima un tiempo total d'unas 2 horas, entre las qualas se realizarán un total de 5 aturadas con as suyas respectivas explicacions interpretativas d'o paisache”, fan memoria dende Ageomonlir.
“I habrá quantos grupos cada 30 min repartius entre las 9.30 horas d'o maitín y las 17.30 d'a tarde. Podetz apuntar-tos a lo grupo que mas tos convienga. L'actividat ye completament gratuita y los interesaus e interesatas en participar habrán d'inscribir-se obligatoriament a traviés d'a siguient web, replenando una inscripción per persona. En realizar la inscripción s'acceptan las normas d'a organización", rematan desde a organización.
