ARREDOL | Iste 25 de setiembre a la meya nueit remata o plazo ta participar en o concurso “Disenya la moda de l’aragonés“, organizau por l’Asociación Cultural Nogara, y con o que quieren esleixir o nuevo modelo de chambreta ta vender en iste curso.
Os textos d’o disenyo d’a chambreta, si bi’n ha, han d’estar escritos a lo menos en luenga aragonesa, podendo-se emplegar toda la resta de luengas que se quiera. Os disenyos s’han de fer plegar en o correu de Nogara (asoziazion@nogara-religada.org) u por Facebook, en o suyo perfil.
A persona que haiga feito o disenyo ganador ganará un lote de productos relacionaus con l’aragonés (libros, chambretas, discos,…). Se sorteyará unatro lote entre totz os participants.
No ye a primer vegada que Nogara fa servir un concurso ta trigar nuevos disenyos t’as suyas chambretas. L’asociación quiere asinas “continar con as fainas de socialización de l’aragonés y de participación de toda la comunidat aragonesofona” que le caracterizan.
Bases d’o concurso:
1.- Se pueden ninviar las propuestas dende o 11 d’agosto y dica lo 25 de setiembre a las 23.59.
2. Trazas de participación:
- Electronica: S’habrá de ninviar un correu ta l’adreza asoziazión@nogara-religada
.org u un mensache privau a lo perfil de Facebook de l’asociación, con dos archivos adchuntos: un, con a imachen d’o disenyo, y l’atro un PDF con os datos d’a persona que participa: nombre, correu electronico y telefono. - Postal: S’habrá de ninviar ta Nogara (Plaza Asso s/n) o disenyo imprentau, con una grandaria de, a lo menos, A4, en un sobre. Aintro d’o sobre cal ficar unatro sobre más chicot a on que apareixcan os datos d’a persona participant: nombre, correu electrónico y telefono.
3.- A persona encargada por l’asociación de replegar totz os disenyos no participará en o churau encargau de trigar o disenyo ganador, ni comunicará a la resta de l’asociación l’autoría d’os disenyos.
4.- Os disenyos habrán de tener prou resolución y calidat de imachen ta poder-se imprentar dimpués sobre as camisetas.
5.- Cada persona puede concursar con un maximo de tres disenyos.
6.- Nogara se reserva la posibilidat de fer bell cambio en o disenyo que considere oportuno, siempre respetando l’esprito de l’orichinal.
7.- En caso de levar bell mensache escrito, iste habrá d’estar, a lo menos, en luenga aragonesa, podendo apareixer en toda la resta de luengas que se creiga menister.
8.- Entre todas as personas que participen en o concurso se sorteyará un lote de productos relacionaus con l’aragonés (libros, discos, chambretas, …). Totz os participants tendrán as mesmas posibilidatz, independientement d’o numer de disenyos presentaus. A persona que haiga feito lo disenyo ganador, tendrá unatro lote.
9.- O disenyo ganador será trigau en una reunión d’a colla de treballo de Nogara que organiza lo concurso. O resultau se ferá publico antis d’o 15 de octubre.
10.- Nogara se reserva o dreito de declarar desierto lo premio.
11.- O disenyo ganador se ferá servir t’as nuevas chambretas que Nogara ferá antes de 2015.