Estas chornadas continan una trachectoria de mas de tres decenios en a cuala se combinan actividaz divulgativas, culturals y participativas con un obchectivo común: acercar l'aragonés y lo catalán d'Aragón a la ciudadanía dende perspectivas diversas y actuals. En edicions anteriors, lo programa ha incluyiu conferencias, procheccions, presentacions, tallers y actividaz en a naturaleza, con as luengas aragonesas como eixe central.
La programación d'este anyo prencipiará l’11 d’abril, con una actividat a l'aire libre en Penyaflor de Galligo, y se desenvolverá entre lo 13 y lo 17 d'abril en o Centro Joaquín Roncal (Fundación CAI) d’a capital d’o país, con propuestas que abracan charradas, procheccions de documentals u estudios sociolingüisticos, entre atros, fomentando l'uso social d'as luengas.
Programa d’actividaz
Las chornadas prencipiarán l'11 d'abril con una actividat en a naturaleza: una corrida d'orientación en Penyaflor de Galligo, d’a man d’Edu Laga. Esta actividat combina esporte, territorio y luenga, en una experiencia que busca meter en valor l'uso de l'aragonés en contextos cutianos y dinamicos.
Lo 13 d'abril, lo protagonismo recayerá en a comunicación y la divulgación cientifica con a charrada “La meteorologia als mitjans de comunicació: de Catalunya a l’Aragó”, a cargo de Ramón Bartolí Sala (meteorologo d’Aragón TV), que a traviés d'a meteorolochía y los meyos de comunicación nos levará a recorrer Catalunya y Aragón.
Lo 14 d'abril, Vero Larraz ofrirá la conferencia “Palestina en aragonés”, una propuesta que une actualidat internacional y compromiso lingüistico, explorando cómo l'aragonés puede estar tamién vehíclo d'analisi y reflexión sobre cuestions globals.
Lo 15 d'abril, lo publico podrá disfrutar d'a presentación de “21.000 parolas (Un capezuto e dos collons)”, de Maxi Campo, un documental de gran carga humana y patrimonial que narra la historia d'Ánchel Lois Saludas, pastor d’Espierba, que entre cuasi meyo sieglo ha dedicau la suya vida a replegar parolas d'o belsetán con l'obchectivo de crear un diccionario y privar la suya desaparición.
Lo 16 d'abril s'abordará un d'os temas clau en a revitalización lingüistica con a charrada “Neofablants d'aragonés y revitalización d'a luenga”, impartida per Chabi Gimeno y Natxo Sorolla. La sesión profundizará en o papel d'as nuevas cheneracions de fablants en a recuperación y normalización d’a luenga.
Finalment, las chornadas se zarrarán lo 17 d'abril con “O Zaguer Chilo”, a cargo de Cherardo Callizo, que dende la suya creyación en 2017 ha estau lo coordinador d’esta iniciativa que connecta la luenga aragonesa con a creyación musical contemporania, an han participau 140 grupos en 7 edicions, abarcando estilos muito diversos como lo pop, rock, rap, folk u mosica tradicional.
Un compromiso con a diversidat lingüistica
Las Chornadas d'as Luengas d'Aragón s'han consolidau como un espacio de trobada ubierta a toz los publicos, an se fomenta lo dialogo entre especialistas, parladors, estudiants y personas intresadas en o patrimonio lingüistico aragonés. La iniciativa reforza lo compromiso de l’Asociación Cultural Nogará-Religada con a defensa y difusión d'as luengas aragonesas, contribuyindo a la suya visibilización y a la suya transmisión intercheneracional.
Con esta nueva edición, la organización aposta per seguir enamplando horizonts, integrando nuevas perspectivas y formatos que connecten la luenga con a realidat social, cultural y tecnolochica d'o present.
