Vecins d’A Madalena plantan tres arbols en o Parque Bruil en un acto reivindicativo

ARREDOL | Os vecins d’A Madalena plantoron iste domingo tres nuevos arbols en o zaragozano Parque Bruil. Lo han feito en un acto reivindicativo a on que han presentau un informe que planteya as suyas principals reivindicacions t’o vico. En l’acto, antimás d’a plantada d’os arbols, s’han dau planters de carrasca ta qui en ha quiesto, s’ha feito un chiquet socalce y bi ha habiu una actividat de cuentacuentos de man de Maricuela. Os más chicotz tamién han puesto debuixar o parque, fendo-ie una improvisada exposición d’as obras suyas. En l’informe, os vecins remeran as obras que se facioron en …

Plantación árboles
Foto: AV Madalena
Foto: AV Madalena

ARREDOL | Os vecins d’A Madalena plantoron iste domingo tres nuevos arbols en o zaragozano Parque Bruil. Lo han feito en un acto reivindicativo a on que han presentau un informe que planteya as suyas principals reivindicacions t’o vico. En l’acto, antimás d’a plantada d’os arbols, s’han dau planters de carrasca ta qui en ha quiesto, s’ha feito un chiquet socalce y bi ha habiu una actividat de cuentacuentos de man de Maricuela. Os más chicotz tamién han puesto debuixar o parque, fendo-ie una improvisada exposición d’as obras suyas.

En l’informe, os vecins remeran as obras que se facioron en 2009 en o Parque, unas obras "muito contestadas y sin garra proceso previo de participación ciudadana", que se facioron "en a pior epoca posible, coincidindo con as vacanzas escolars y a tradicional Chera de Sant Chuan".

En istas anyadas, os vecins creyen  que o mantenimiento d’o parque no ye estando como caleba. En l’informe se detalla o mal estau d’a yerba, os arbols muertos u estricallaus que no s’ha remeso u a existencia de bells puntos negros a on que s’amuntona a vasuera. Encara que demandan as responsabilidatz t’o Concello d’a ciudat, tamién claman a la responsabilidat de totz y todas os vecins ta mirar de cudiar d’entre totz as carreras d’o vico, os arbols y tot lo parque.

L’acto ha contau con a participación de más d’un ciento de personas, entre os que yeran arrienda ninos y ninas que han aduyau a fer a plantación. "Asperemos que os arbols que hue plantamos conten en 200 anyadas a la chent que no tot lo faciemos tan mal", deciba un d’os organizadors de l’acto, antis de prencipiar a plantar un d’os tres arbols. Istos sustituyiban a atros que s’heban muerto u rancau por o cierzo.

L’actividat ye estada convocada por as asociacions de vecins “Calle y libertad” y d’o Parque Bruil – Sant Agostín, l’AMPA d’o colechio Tenerías, Gusantina, la Pantera Rossa y l’asociación ANSAR.

[Galería de imachens por AV Madalena]

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies