Lo municipio aragonés de Valtorres -Comunidat de Calatayud- s'une a atros tres castellans, Pancorbo y Huerta del Rey en Burgos y Herrera del Pisuerga en Palencia, pa lo lanzamiento d'o prochecto piloto VIDI Rural, enmarcau dentro d'a iniciativa Rural Star coordinada per la Universidat de Burgos d'a man de Realserma Rural, que s'encetará los días 14, 15, 16 y 17 de chulio.
Lo prochecto Rural Star "Respuesta Unificada pa la Repoblación Activa y Luita contra la despoblación", financiau per lo Ministerio de Transición Ecolochica y Reto Demografico, d'o cual ye beneficiario lo concello burgalés de Huerta del Rey tiene dica lo 31 d'aviento de 2025 pa levar-lo a cabo en a suya totalidat. Valtorres ye un d'os municipios participants, que conta como impulsors d'a mesma a la Universidat de Burgos y Delera Rural, consultora aragonesa “especializada en desembolique rural innovador”.
L'obchectivo d'o prochecto ye “aduyar a las comunidaz locals pa definir solucions que empenten u milloren los retos d'a vivienda inherents a cada lugar. Actuacions concretas a curto, meyo y largo plazo basadas en as necesidaz reals de vivienda d'a población permanent u vinculada, asinas como las d'as interpresas pa poder dar servicio a los suyos treballadors, entre atras”, destacan.
Seguntes explica Débora Serrano, fundadora de Realserma Rural “cuan definimos lo prochecto tenébanos claro que, pa que las solucions que elaboremos, realment s'adecúen a las necesidaz d'o lugar y no se queden en meros plantiamientos teoricos cheneralistas, habría d'estar clau preguntar a la población qué ye lo que amenesten de forma concreta y treballar as solucions sobre ditas necesidaz”.
Per ixo lo prochecto VIDI STAR “busca fixar los alacez” pa saber qué ameneste cada lugar y los recursos que disposa actualment y s'ha plantiau con tres ferramientas: la primera “un café comunitario pa explicar lo prochecto, charrar d'os mas de cuaranta problemas que lo mundo rural tiene per debant pa solucionar lo problema d'a vivienda rural, concretarlo en cada lugar y ascuitar a la población”.
Segunda ferramienta, “la puesta a disposición d'os formularios de necesidaz de vivienda de Realserma Rural a lo largo d'o verano. Queremos que nos digan quí ameneste mercar, vender, logar, reformar, rehabilitar, calefacción, acuerdos, herencios, financiamiento, etc. Tamién queremos conoixer a lo teixiu profesional relacionau con o sector constructor y immobiliario en cheneral d'o lugar. La replega d'as necesidaz se ferá en papel en o café tertulia y a traviés d'a web d'o prochecto VIDI Rural Star d'a Universidat entre lo verano”, detallan.
Y, como tercera ferramienta, la “elaboración per parte de Realserma Rural d'o decalogo y linias d'actuación y acompanyamiento a las corporacions locals dica final d'anyo en aquellas linias d'actuación que decidan desenvolver”. “Ixo sí, con a limitación que, al no disposar los concellos de totas las competencias en materia de vivienda ni de totas las capacidaz pa solucionarlo, i habrá solucions que puedan desenvolver per él mesmos, atras que amenesterá acuerdos y colaboracions con tercers y atras que la suya función será merament d'impulsor u comunicador pa que terceras partes privadas u publicas, puedan desenvolver”, destacan dende la organización d'o prochecto.
En finalizar lo prochecto VIDI Rural Star, Realserma Rural atorgará a cada lugar “lo sello de calidat de Lugar Responsable con a Vivienda, PRV”, un sello que atorga Realserma Rural a aquels lugars que acrediten que “pa la resolución d'os problemas d'o suyo lugar en materia de vivienda han seguiu una metodolochía d'analisi y treballo d'exito que permita fixar los alacez pa desenvolver actuacions intelichents, que impacten en a resolución d'os problemas d'as personas d'o lugar a curto, meyo y largo plazo”, concluyen. Lo café comunitario en Valtorres se realizará lo 17 de chulio a las 12:00 horas.
Sesión formativa “pa fortalecer lo asociacionismo” en chicoz municipios
Lo proximo 23 de chulio, a las 11:00 horas, se celebrará dende Valtorres -Comunidat de Calatayud- una sesión formativa online “enfocada en l'enfortimiento d'o teixiu asociativo en municipios chicoz”. Esta acción tamién s'enmarca en o prochecto Rural Star, que lo suyo obchectivo ye “fomentar rez vecinals activas y espacios organizaus en o meyo rural”.
La trobada, de carácter participativo, ofrirá ferramientas practicas pa la dinamización d'asociacions locals, y ye dirichida tanto a colectivos en funcionamiento como a agrupacions en proceso de creyación, amás de tecnicos municipals u cualsequier persona intresada en promover nuevas formas d'organización en a suya localidat.
“Encara que se desenvolverá per vía telematica, lo taller se centra en o contexto de Valtorres y la suya aria d'influencia, una zona con fuerte potencial pa lo treballo colectivo pero que, como muitas atras, enfrontina desafíos per lo que fa a la continuidat y revitalización d'as suyas agrupacions socials”, destacan dende la organización, que mete a disposición cheneral la connexión a traviés d'a plataforma Zoom, en o siguient vinclo, y habilita “pa resolver dudas u enamplar la información”, lo correu exitorural@ubu.es y lo numero de telefono 947 256 752.
