L'actividat ye organizada per lo Concello de Artieda d’Aragón -Comarca d’A Chacetania-, l'asociación Artieda Romana, y os equipos d'arqueolochía d'a Universidat de Zaragoza y la Université Bordeaux Montaigne, con l'obchectivo d'amanar a la ciudadanía los zaguers hallazgos y abances d'a present campanya d'excavación.
Las visitas guiadas se ferán en dos redolins, a las 9:30 horas y a las 10:45 horas. Pa asistir, ye imprescindible realizar preinscripción u ninviar un correu electronico a artiedaromana@gmail.com, indicando lo nombre y lo numero de personas intresadas. Pa mas información, se puede contactar telefonicament con l'asociación Artieda Romana en o 629 590 737.
La chornada permitirá a las personas asistents conoixer de primera man los treballos que se son desenvolvendo en o yacimiento, declarau Bien d'Interés Cultural (BIC) per lo Gubierno d'Aragón, an se ye completando la excavación d'un monumental edificio termal romano. Dende lo suyo escubrimiento en 2021, lo yacimiento ha revelau importants hallazgos, como un mosaico bícromo con escena marina (vestibulum) y un segundo mosaico cheometrico, posiblement perteneixient a un frigidarium.
Amás d'a visita a lo yacimiento, la chornada incluyirá como novedat una actividat didactica en a ermita de San Pedro desenvuelta per l'equipo cientifico d'o yacimiento, con a presentación d'un tráiler como abanzo d'o documental d'a historia d'o yacimiento arqueolochico de Artieda chunto a las novedaz tecnolochicas aplicadas en a investigación, como as reconstruccions virtuals y l'emplego de gemelos dichitals pa l'analisi y monitorización d'a ciudat romana. Asinasmesmo, se son desenvolvendo enquestas educativas en o marco d'o prochecto UNITA Starting Grant “HerOn”, con o proposito d'amillorar la divulgación cientifica y la connexión entre arqueolochía y sociedat.
Lo municipio de Artieda cuenta, amás, con una exposición permanent en a torre d'a ilesia de Santo Martín de Tours, an pueden contemplar-se diversos obchectos arqueolochicos y la reproducción a escala real d'o celebre mosaico bícromo romano trobau en 2021. Este anyo s'incorpora tamién la replica d'a inscripción funeraria de Valeria Massa.
La cinquena campanya d'excavacions arqueolochicas en lo Forau d'a Tuta, que prencipió lo pasau 7 de chulio y se prolongará dica l'1 d'agosto, ye fruto d'a colaboración y financiamiento conchunto d'o Concello de Artieda, lo Gubierno d'Aragón, la Fundación Agencia Aragonesa para la Investigación y Desarrollo (ARAID), la Unión Europea (Fondos NextGeneration), l’Institut Ausonius d’a Université Bordeaux Montaigne, lo Seminario de Geomática aplicada a la Arqueología y el Patrimonio (SeGAP) d'a Facultat de Filosofía y Letras de Unizar, y lo IPH d'a Universidat de Zaragoza.
