Un nacionalismo espanyol desinformau enriste contra l'aragonés

O zaguer martes 13 de septiembre, en uno d'os tradicionals programas d'os "maitinos d'a Radio con Federico", o polifacetico periodista turolense F. Jiménez Losantos (Orihuela del Tremedal, 15/09/1951), tornó a tener una d'as ya suyas tipicas salidas de tono. La suya condición d'estar naixiu d'a provincia de Teruel no le ha librau ista vez d'o cutiano desconoiximiento con que o nacionalismo espanyol gosa tractar as noticias d'as minorías lingüisticas de l'Estau espanyol. Y asinas, en anunciar o prencipio d'o nuevo curso escolar con as nuevas clases en aragonés como asignatura vehicular, Federico prencipió a escanyutar y afirmar que a luenga …

O zaguer martes 13 de septiembre, en uno d'os tradicionals programas d'os "maitinos d'a Radio con Federico", o polifacetico periodista turolense F. Jiménez Losantos (Orihuela del Tremedal, 15/09/1951), tornó a tener una d'as ya suyas tipicas salidas de tono.

La suya condición d'estar naixiu d'a provincia de Teruel no le ha librau ista vez d'o cutiano desconoiximiento con que o nacionalismo espanyol gosa tractar as noticias d'as minorías lingüisticas de l'Estau espanyol. Y asinas, en anunciar o prencipio d'o nuevo curso escolar con as nuevas clases en aragonés como asignatura vehicular, Federico prencipió a escanyutar y afirmar que a luenga aragonesa nunca no s'heba charrau en Teruel, Zaragoza nian Uesca capital.

Desconoixemos os estudios que Federico haiga teniu como complemento a o periodismo, pero creyemos que si ha de criticar un tema, d'as trazas que ell lo fa, habría de informar-se-ne primero.

Por todas/totz ye conoixiu que en Zaragoza son muitas as personas practican a luenga aragonesa y se socializan en ella, en o que puede considerar-se una chicorrona comunidat de parladors. Belunas lo transmiten a os suyos fillos/as.

Seguntes os datos d'o Censo d'o INE de 2011, 21000 habitantes de Zaragoza conoixeba l'aragonés u beluna d'as suyas variedatz, un 38% d'a cifra total de tot Aragón. D'ells, bells mils son charradors cutianos d'a mesma.

Encara hue quedan repuis lexicos en a parla y prou toponimia local en aragonés (Valdefierro, Valdespartera, camino de la Noguera, Malpica, Cogullada,...). A tamás d'a suya riquisma historia, a luenga aragonesa ye hue acubillada en bellas zonas d'o Norte de Aragón, y tamién d'a provincia de Zaragoza.L'aragonés ha estau luenga cutiana en Zaragoza entre sieglos (como contrimuestran cientos de documentos oficials d'a ciudat, entre ells as Actas d'o Concello d'o sieglo XV u as Cronicas d'o Puent de Piedra). Buen eixemplo de l'aragonés ta par dalavez pueden estar textos como:

-Un "Pregón anunciando un médico en Zaragoza en 1409"

-Lo "Pregón sobre la circulación nocturna por las calles de Zaragoza en 1411"

-A "Protesta de Sancho Aznárez de Gardeny, síndico del concejo de Zaragoza, ante las Cortes de Aragón en 1389". Qui demanda explicitament poder acceder a la chusticia en "lengua aragonesa" en tractarse d'o Reino d'Aragón.

Ya en tiempos de Chaime I d'Aragón se trovan textos extenso en aragonés como "Vidal Mayor", u prou que sí tamién o primer texto documentau en luenga aragonesa, que precisament ya d'a provincia de Zaragoza, documentos d'o Monesterio de Veruela, como ye la "Carta Puebla" de 1245 en Pozuelo d'Aragón.

Prou que a luenga aragonesa tamién estió present en texto de Teruel, refleixo d'o suyo emplego tamién en ista provincia. O "Fuero romance de Teruel" d'o sieglo XIII en ye un buen eixemplo, y zonas d'as comunidatz d'a "Extremadura aragonesa" en Teruel tienen un largo historial de textos oficials.

Libros editaus por "Estudios. El Justicia de Aragón" como lo de Francho Nagore, analizan os aspectos lingüisticos de l'aragonés de istos textos en os fueros de Teruel y Albarracín, p. eix.

Pa rematar, no cal que pasar-se por o Baixo Aragón (Teruel) pa sentir a suya parla viva, y apercazar-se de que estió una d'as zaguers zonas en Aragón an que se deixó de charrar aragonés recientment.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies