La investigadora Ana Wünsch, d'o departamento de Ciencia Vechetal d'o Centro d'Investigación y Tecnolochía Agroalimentaria d'Aragón (CITA), y l'investigador Afif Hedhly, d'a Fundación ARAID en a Estación Experimental Aula Dei (EEAD-CSIC), han presentau “una ciresera siempreverde”, un árbol que no dentra en reposo hibernal y, per tanto, mantiene las suyas fuellas y contina creixendo entre tot l'anyo.
Este material ye solo en a especie y representa un abance significativo pa la encerca agraria, ya que servirá “como ferramienta pa estudiar la regulación d'o creiximiento estacional y l'adaptación a climas templados, aspectos esencials en a producción frutal actual debant d'o cambio climatico y la necesidat d'enamplar las zonas de cultivamiento”, destacan dende la DChA.
La ciresera -cerezo, en castellano-, como atros frutals de ueso, ameneste fredo hibernal pa florir en primavera y producir fruita en verano. Manimenos, la reducción d'o fredo a causa d'o cambio climatico afecta negativament a la producción. Per ixo, la comunidat cientifica treballa “pa comprender los mecanismos cheneticos y moleculars que regulan este proceso, con l'obchectivo de desenvolver variedaz adaptadas a rechions mas calidas y l'adaptación d'os frutals de ueso a lo cambio climatico”.
Este valuroso material s'ha obteniu per medio de tecnicas tradicionals de millora vechetal dimpués d'anyos de treballo en a linia d'investigación liderada per Ana Wünsch en o CITA, con l'emparo d'o personal de campo y laboratorio d'o departamento de Ciencia Vechetal, en colaboración con a EEAD- CSIC y la Fundación ARAID. Actualment, la investigadora predoctoral Nerea Martínez-Romera treballa en a caracterización fisiolochica y molecular d'este material como parte d'a suya tesi doctoral dentro d'o prochecto CHERRY_BREED.
La presentación y caracterización inicial d'esta ciresera siempreverde s'ha publicau recientment en a revista cientifica especializada Frontiers in Plant Science (doi: 10.3389/fpls.2025.1677862).
