ARREDOL | A las 13.50 d’iste miercols, un artefacto ha esclatau aintro d’a Basilica d’o Pilar de Zaragoza causando danyos materials en uns bancos y una ferida en un d’os oyius por o rudio. A policía ha feito desaloixar a tot estrús a Basilica y a Plaza d’o Pilar y as carreras d’arredol, quedando parti d’Echegaray y Caballero tallada t’o trafico de personas y vehiclos.
En l’inte d’escribir ista noticia contina sin saber-se guaire sobre l’artefacto, encara que a mas gran parti d‘as informacions sinyalan que yera artefacto explosivo basau en una bombona de camping gas. Se desconoixe l’autor u autors y tampoco no lo ha reivindicau garra persona u colla.
Os Tedax, expertos en explosivos y a policía, aduyada de cans, han feito una ampla busca en a ilesia y a redolada, zarrando tamién o parking d’a Plaza. Entre as 16.00 y as 17.00, o cordón policial ha iu achiquindo-se y tornando a poder circular-se por as carreras d’a redolada.
