Torna 'Trobada - Vivir en aragonés': fendo immersión lingüistica pa charrar un millor aragonés

A trobada ye una iniciativa empentada por un grupo d’activistas por l’aragonés, amants d’a cultura aragonesa que en 2014 creyoron l’asociación Trobada - Vivir en Aragonés. No se celebraba dende 2018, pero un grupet de chent con ganas de retomar o prochecto ha parau a IX Trobada Vivir en Aragonés lo cabo de semana d’o 26 al 28 de noviembre en Casa Ger en Yeste -Plana de Uesca-.

A propuesta feita dende Trobada - Vivir en aragonés, ye “fer una trobada d'un cabo de semana de chent que l’agane d’amillorar l'aragonés oral, fendo immersión lingüistica. Queremos chuntar-nos entre todas pa fer unas chornadas en do aprendamos las unas d’as otras pa charrar un millor aragonés”.

“La idea ye de creyar ixos días un ambient do l'aragonés siga a sola luenga de comunicación entre nusatras pa fer posible vivir en aragonés. Amás, se mira d’acudir a puestos en do se charra aragonés, con el obchetivo d’achuntar a personas nativas con neofablants”, sinyalan. Esta edición se fa en Casa Ger de Yeste, en una redolada an que se perdió la luenga fa pocas cheneracions. Antimás, en a localidat vecina d’A Penya, l’asociación cultural Nogará ha prencipiau estianyo un curso d’iniciación a l’aragonés con una presencia important de chovens d’a zona.

“Casa Ger ye una Casa Rural diferent. Mira d’estar un espacio do desenrrollar prochectos artisticos y culturals de toda mena y quiere tornar-se en un puesto de trobada y de dinamización pa la suya redolada. Renaixe por un prochecto de rehabilitación d’un espacio prou singular: se situa en Yeste un lugar meyo espaldau por a construcción d’o entibo d’A Penya, que ye en a val de Triste. Amás, en este espacio son compromesos con a luenga y o territorio”, detallan dende la organización.

O programa prencipia lo viernes 26 con una clase d’aragonés feita por l’asociación cultural Nogará. Y, dimpués de cenar, se fará un club de lectura arredol d’a novela «Díxame pescá con tú» de Juan Carlos Marco. “L’autor nos acompanyará pa poder recontar-nos os secretos d’o libro y, de seguras que tendremos bell debate interesant”, s'asegura.

O sabado 27 no caldrá amaitinar muito, pues o dia prencipia con una ruta interpretativa por a redolada que organiza a chent de Casa Ger. Dimpués, se ferá una clase de palotiau con Dabi Lahiguera d’o Grupo Moncayo 900. “Aturaremos pa chentar porque de tardis, Nylon Silvestre dirichirá o mural colaborativo que pintaremos en a Casa. Pa rematar o día, nos contaran a suya experiencia como dinamizadoras socials y culturals d’o mundo rural Lola Gimenez de Biscarrués y Marta Marín d’Echo”, relatan.

Pa lo domingo 28, lo programa s’ha feito en colaboración con Lo Capazo. Lo Capazo ye una trobada mensual que fan os chovens d’o Viello Aragón lo zaguer domingo de cada mes y que cada vegada tiene una tematica diferent, fendo-se esta edición en colaboración con Trobada arredol d’a luenga aragonesa. Os actos prencipiarán con a presentación por parte de l’autora d’o libro “Ansó. O vestiu populá” d’Elena Gusano y Dabí Latás. Dimpués se ferá a lectura de poemas en variedatz d’o Viello Aragón: cheso, ansotano y panticuto. De vez, i habrá radio en aragonés en directo con a chent de Radio Espiritrompa de Candearenas. Pa rematar bi habrá un concierto de rap con Krevi Solenco.

“Asperamos que la chent disfrute asaber-lo d’as actividatz. Vos asperamos dende lo viernes en Casa Ger charrando en aragonés por Yeste. Como diz o refrán: minchar y gratar, tot ye empecipiar!”, concluyen.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies