L’Aínsa reaviva la emoción previa a la celebración d'a emblematica Morisma con un video mapping que este pasau sabado se prochectó sobre la fachada d'o concello debant de cientos de personas. Lo treballo, de cinco menutos de duración, ye una succesión d'imáchens que replegan este legendario capítol d'a historia d'Aragón, y que prencipiaba con l'aparición de Pentafuria, lo personache que estió novedat y zaguera encorporación a lo elenco en 2022.
“Lo video mapping reflecta una parte d'a nuestra historia que cal reconoixer y reivindicar, y que resultó fundamental en a creyación d'o Reino d'Aragón”, apunta Isabel Bergua, presidenta de l'Asociación Cultural La Morisma. “Ha estau un treballo laborioso, nos ha costau meses. Pareixe increyible que dezaga de cinco menutos de prochección pueda haber tanto treballo, pero asinas ha estau. Recabar información, imáchens que podesen encaixar. Somos contentos, a la chent le ha feito goyo y ye la nuestra forma de celebrar estes trece sieglos d'historia”.
Entre cualques d'as imáchens que replega l'audiovisual, s'ha quiesto dar especial valor a los soportales d'a Plaza, pues con a otorgación de bels privilechios a la villa se permitió realizar ferias en distintas calendatas. “En L’Aínsa i habió muita vida artesanal, se creoron los soportales perque yera zona de mercau, y s'atorgó lo dreito d'uso de la marca 'Maschus Ville Ainse' pa piezas elaboradas en plata. Tamién querébanos que se veyese la epoca d'as tropas francesas, cuan L’Aínsa estió totalment cremada, y la importancia que siempre ha teniu l'augua per la suya ubicación en a confluencia de dos ríos”, anyade Bergua. Lo recorriu plega dica l'actualidat con imáchens de dron de tot lo casco viello y la zona d'o castiello. Pa la suya elaboración se contó con a interpresa aragonesa Produccions Viridiana. Se prochectó a las 23.00h y a las 00.00h y vinió acompanyau d'una chicota interpretación an amaneixen los personaches d'o Diaple y Lo Pecau, que los suyos papels asumen dica agora los vecins Guillén Palacín y Quino Coronas.
Manimenos, la nueit prencipiaba con l'homenache a José Luis Mur Vidaller, conoixiu per as suyas dotes futbolisticas de choventut y la suya afición a la fotografía, convertida fa decenios en una prolifica profesión, asinas como per abrir lo recient Museo de Ingenios Musicales de Labuerda. Estió entre las suyas obras de rehabilitación que trobó un escudo gravau en piedra d'a Villa de L’Aínsa, datau de l'anyo 1.603. Lo mas antigo con l'árbol de Sobrarbe de cuantos se conoixen dica hue. “Como labordense, feliciano y gurrión pa los amigos, tiengo la honor de fer donación a lo concello de L’Aínsa-Sobrarbe d'o que lo azar y la serendipia metioron en as mías mans al acometer las obras de rehabilitación de Casa Felipe de Labuerda, hue Museo de Ingenios Musicales (MIM)”, deciba Mur este pasau sabado frent a lo nutriu publico.
“Aprofitando la zaguera oportunidat de veyer-lo y tocar-lo antes que estase entregau, recibié la visita d'Ángel Gari, Pilar García Buetas y Blas Coscollar. Abundoron en detalles y consideracions que le dan a la pieza una valor prencipal. Quiero manifestar que un apasionant camín s'ubre pa los expertos”, continaba lo propietario d'o MIM. Y destacaba que encara que fillo de Labuerda, la suya vinculación con L’Aínsa se remonta a la suya infancia. “Acudiba a mercar lo zaguer numero d'o Capitán Trueno. Lo mío pai m'entregaba cinco pesetas en calderilla y recorreba totas las casas d'a villa mercando piels de conello. Allí estié con o primer carrete de fotos, que lo reveló y positivó Altemir. Recuerdo tamién los míos anyos de estudios en l'instituto, an me die a conoixer y estió motivo pa fichar por a UD Barbastro. Lo mío primer treballo como camarero en o cine Avenida, los amigos que aquí conservo. Per tot ixo he considerau donar lo escudo", concluyiba.
Lo concello acceptó la donación lo pasau 12 d'agosto y a traviés de Beatriz Salcedo, tenient d'alcalde y concejala de desembolique y promoción turistica, agradeixió la donación “d'un bien de tanta importancia pa lo nuestro municipio, ya que acredita y documenta lo escudo d'a nuestra villa fa ya mas de 400 anyos. Esta chicota parte d'a nuestra historia que agora nos lega quedará exposada en o museo d'artes y oficios tradicionals", anunció.
L'evento d'este pasau sabado, pleno de solemnidat y d'emoción, ha estau la perfecta antesala a la representación bienal, que este anyo se celebra lo 31 d'agosto y que ya tiene las suyas dentradas a la venda en web oficial.
