[/caption]
Os sindicatos SOA, CGT, CNT, CATA y Intersindical d’Aragón han convocau vada cheneral de triballadors o venient 29 de marzo en Aragón. A convocatoria, que coincide con a calendata sinyalada por UGT y CCOO y os sindicatos de Galicia y o Pais Vasco y Navarra, s’ha presentau hue en o rechistro d’a DChA, fendo una crida a os ciudadans a movilizar-se contra la reforma laboral y as retalladas socials empentadas por o gubierno espanyol.
Istos sindicatos, que levan bells anyos salindo de conchunta ta la carrera contra as reformas de l’anterior gubierno espanyol y d’iste, asperan movilizar a os aragoneses contra las midas de l’executivo espanyol. En os venients diyas, y aintro d’a campanya ta movilizar os ciudadans, ferán bells actos en as ciudatz y lugars d’Aragón ta concienciar a os ciudadans aragoneses ta salir ta la carrera ixe diya 29 de marzo.
Os convocants no buscan con a movilización reformar o decreto lei d’o gubierno espanyol ta cambear o marco de rilacions laborals sino obligar a l’estau a derogar-lo de raso, porque “atenta contra os dreitos d’os triballadors aragoneses y posibilita una baixada de salarios cheneralizada baixo la menaza de despido”.
O diya 29 de marzo, amás, os sindicatos convocants d’a vada en Aragón se manifestarán chuntos por as carreras d’o país.
Fuent: Arredol
