L'Achencia Espanyola de Protección de Datos (AEPD) ha castigau a la Directa por as investigaciones periodisticas sobre a infiltración d'achents d'a Policía Nacional espanyola en movimientos socials y l'independentismo en Catalunya y o País Valencià. A resolución ye conseqüencia d'as reclamacions presentatas a prencipios de 2025 por cuatro d'os propios policías infiltraus, que acusaban o medio d'haber revelau datos personals.
Seguntes ha explicau la Directa, a resolución considera que a información publicada permitiba identificar a os achents infiltraus y ordena retirar parte d'os contenius publicaus. O medio considera que ista decisión afecta gravement a integridat d'a investigación periodistica, a libertat d'información y o dreito d'a ciudadanía a conoixer feitos d'un evident interés publico.
As infiltracions investigatas por la Directa correspondían a operacions d'espionache desenvolvidas en movimientos socials y politicos que, seguntes a investigación periodistica, se facioron sin autorización chudicial.
Irídia recorrerá a resolución
Irídia – Centro por a Defensa d'os Dreitos Humans asumirá a defensa churidica de la Directa y presentará alegacions contra o procedimiento sancionador, demandando o suyo archibo.
En a rueda de prensa celebrada iste miercols en o Colechio de Periodistas de Catalunya, la Directa y Irídia explicoron o conteniu y l'alcance d'a resolución, amás d'anunciar as acciones churidicas que emprenderán y advertir d'as implicacions que puede tener ta la libertat d'información y l'exercicio d'o periodismo d'investigación.
“Sancionen qui investiga, protegeixen qui s’infiltra”
Coincidindo con a publicación d'a sanción, la Directa ha difundiu o comunicau “Sancionen qui investiga, protegeixen qui s’infiltra”, en o qual denuncia que a resolución d'a AEPD proteche a identidat d'os achents infiltraus y penaliza o treballo periodistico que los sacó a la luz.
O comunicau afirma que a retirada de parte d'os contenius publicaus sentaría un precedent perigloso ta o periodismo d'investigación y reclama a revocación d'a resolución. O texto ya ha reculliu l'adhesión de decenas de medios de comunicación, organizacions y colectivos.
AraInfo ye un d'os medios que s'ha sumau a iste comunicau, chunto con Argia, El Salto, Gara, La Marea o Crític, amás de numerosas organizacions y colectivos socials, en defensa d'a libertat d'información, d'o periodismo d'investigación y d'o dreito d'a ciudadanía a conoixer feitos d'interés publico. O comunicau contina ubierto a nuevas adhesions y puede firmar-se en iste vinclo.
