L'alcaldesa de Samianigo, Berta Fernández, explica que “en chulio y agosto la cultura sale d'os espacios habituals y se treslada a las carreras, y a los lugars d'o nuestro municipio con l'obchectivo d'amanar totas las propuestas a la mayoría de publico. La mayoría son pensadas pa estar compartidas en familia, con amigos, con toz aquels que quieran pasar un buen rato”.
Lo mes de chulio ye dedicau a las fiestas de Samianigo, a las fiestas d'o vico Santiago y a las verbenas, las i hai toz los cabos de semana, “pero ixo no priva que sigamos mantenendo una achenda cultural de libel. En ixe sentiu en chulio las nuestras propuestas culturals se centran en o Museo Ángel Orensanz y Artes de Serrablo”, recalca.
L'achenda d'este museo empecipia este viernes a las ueito d'a tarde con una conferencia sobre “Los orígenes prehistóricos del paisaje sacro y el monte Oturia”, endrezada per Martín Almagro Gorbea, un d'os mas relevants arqueólogos de l'actualidat. Lo mierques 9, Carlos Garcés charrará d'o suyo libro “Las endemoniadas del valle de Tena”, y a l'atro día, se ferá a devantadera d’a exposición fotografica “Arquitecturas que fueron”, gracias a la colaboración de l'Asociación Fotografica de Sabiñánigo.
Lo cabo de semana d'o 19 y 20 i habrá una nueva edición d’a chornada de puertas ubiertas. Y rematará chulio con a presentación lo día 31 d'a novela “Los ojos tras la montaña”, de Pablo Fantova. Este, que ye lo suyo primer treballo, ye una historia que trascurre en Puértolas an recrea cómo yera la vida en esta val d'o Pirineu a primers d'o sieglo XX, “y an se fa memoria y homenache a tota ixa chent que gosa estar ixuplidada per la historia, en una mescla de realismo machico y trachico, y que sirve de testimonio d'a nuestra memoria colectiva pa no cayer en l'ixuplido”, asevera l'alcaldesa.
Lo mes d'agosto empecipiará con o Güestival de Larrés. Lo día 8 la obra lo “Patito feo”, d'A la Sombrita Teatro, se puyará a lo auditorio La Colina. “Se trata d'un teatro de uembras que empenta la imachinación”, apunta la edil.
A l'atro'l día en o parque Petersberg se ferá lo espectáculo “Nada”, de equilibrismo comico d'a companyía Nostraladamus. “Ye la historia d'un barco varado, una propuesta muito apetecible en un espacio an dica agora no hébanos programau cosa”, subraya Berta Fernández. Amás, lo día 15 en o Molino Periel, lo grupo Disparatario representará lo viache d'aventuras y machia con a obra “Dónde están los monstruos”.
Ya lo mierques 16 i habrá teatro de carrera en Ibor con o grupo Con Rasmia y lo suyo espectáculo “Atraparte”. Observación astronomica en o boulevard de Puente Sardas con o grupo Sirio. Y la Nueit en Blanco en a carrera Serrablo “con os comercios en a carrera”, ha desgranado la concejala de promoción Isabel Mañero.
Lo 17 será lo concierto de batería en os chardins de Pirenarium, lo 21 en L'Hostal d'Ipiés i habrá unatro d'o guitarrista José Antonio Chic, lo 22 en o Molino Periel será Baruca con Viki Lafuente, lo 24 en o ábside d'o parque municipal cantará Caranzalem Trío, lo 28 en Aurín será lo Cuarteto de Saxofones Ciudad de Sabiñánigo, lo 30 i habrá verbena con o dúo Reymi en Borrés, lo 31 en o Museo de Dibuixo de Larrés actuará Karmento, en o marco d'o festival Sonna d'a DPU, y los días 29 y 30 se celebrará en Samianigo lo Festival Sabiñam “con mosica, gastronomía, tallers y cuantas actividaz”, detalla Isabel Mañero.
Amás, cal destacar este verano las visitas guiadas a lo parque de maquetas de Pirenarium, a lo Molino Periel y a lo Centro d'Interpretación d'os Glaciars. Estas actividaz se pueden adquirir las dentradas de forma online: dentradas visitas Centro Interpretación d'os Glaciars de Senegüé (chueves, viernes y sabados de chulio y agosto), dentradas visitas teatralizadas Parque de Maquetas (viernes de chulio y agosto), dentradas visitas guiadas Parque de Maquetas (sabados de chulio y agosto).
Totas estas actividaz se completan con atras esportivas como lo torneo de pádel lo 18 y 19 de chulio que organiza Peña la Sala, lo torneo Santiago de Natación lo día 19 que lleva a cabo GMS, lo trofeo Santiago de pesca (GMS) y lo torneo de golf en as margas, amás d'a Milla Urbana lo día 22.
Con esta achenda ya en marcha, Berta Fernández y Isabel Mañero convidan a vecins, vecinas y visitantes “a participar en esta programación que tiene actividaz pa toz los publicos”.
