Un forau en o gudron d’una carrera, qualsiquier carrera d’ista ciudat. Un chito bi creix con os suyos quatro petalos. Quatro febles petalos royos que ya acucutan enta alto. Feble flor naixida d’una simient que viacho en o melico d’o cierzo. Mala yerba que creix con o permiso de dengun. Mala yerba que fa tranya en ista feble luenga de quatro petalos. Continamos con a delera d’emplir-lo tot de flors. Que o cierzo bufe concietero, que a simient viache enta qualsiquier forau de qualsiquier carrera d’ista ciudat. Que l’anyo venient tornen a acucutar os suyos quatro febles petalos royos.
Emision d’estrela a estrela (2). A simient creix y iste anyo creixen tamien as horas d’emision y o numero de programas. Blincaremos por alto as dotze horas d’a pasada edicion emitindo de raso en aragones. Y mas novedatz, como por eixemplo que tendremos bell programa tamien en catalán, como atra d’as luengas propias d’Aragón. O sabado 1 d’aviento en Radio Topo 101.8 FM empliremos tot de flors royas, de quatro petalos, con a segunda emisión d’estrela a estrela. Creixemos enta alto, febles pero argüellosas.
Quan tasament manca una semana t’a emision d’estrela a estrela (2) tos deixamos con iste vidio feito d’imachens d’a emision de l’anyo pasau.
Creixemos enta alto, febles pero argüellosas. Si l’anyo pasau encetemos istas emisions especials con 12 horas de raso en aragones, a present edicion contamos con fer-ne 16. Programas de Radio Topo que feran especials en aragones (y catalan), viellos programas d’a emisora que tornan ta ista enchaquia, programas d’a resta de Radios Libres d’a ciudat (La Granja, MAI y Chabolo) y bells especials mas. Totz chuntos en esfensa d’as nuestras luengas.
T’asperamos o venient sabado 1 d’aviento dende as 8.00 horas d’o maitin dicas as 00.00 horas d’a nueit, en Radio Topo 101.8 FM. Imos a plenar-lo tot de flors! Y en rematar a emision feremos una fiesta en l’Avv Arrebato, i sotz totz y todas convidadas!
Fendo Orella (Radio Topo 101.8 FM) | Para AraInfo
