Puyalón de Cuchas, a organización politica d’a Cucha Independentista Aragonesa quier fer publico que deixará d’fer parti d’a “Coordinadera Aragón Trilingüe”.
As nuestras conviccions, como se puet consultar en a ponencia politica surtida d’a nuestra Asambleya, son que l’aragonés y o catalán, luengas propias d’Aragón nomás pueden salvarse con un refirme radical, urchent y decidiu. No podemos renunciar a la oficialidat d’as tres luengas en piet d’igualdat, como dictamina a UNESCO y/u qualsiquier persona que tienga o más chicot aprecio enta o nuestro patrimonio lingüistico como pueblo, y que tamién en ye d’a humanidat.
Tampoco no podemos fer una acción feble, esfendendo una lei de luengas que no plegaba a los minimos exichibles, no ya por a nuestra organización, sino sisquiera por a lechislación europeya y internacional quanto a lo patrimonio y los dreitos d’as luengas minorizatas y os suyos fabladors. Prou que refusamos de tot o prochecto de lei de luengas que preba de fer o PP-PAR, pero a Lei encara vichent, tot y estando un trango entabant, no yera a solución t’os problemas d’as nuestras luengas.
L’aragonés, antimás, ye en una situación de particlar febleza, en tener una masa de fablants chicota, garra refirme institucional y en salir-se bellas organizacions d’o consenso normativo plegau a radiz d’o II Congreso por l’aragonés. Salida ista d’unas trazas que encara no plegamos a entender sino ye por qüestions personals u d’intreses politicos, y no pas culturals u lingüisticos.
A tamás d’haber preso amprau o nombre d’a Coordinadera Aragón Trilingüe, poco tien que viyer ista con a que levó t’as accions politicas que rematoron en a más gran manifestación que ha conoixiu a luita por as luengas d’Aragón. Si aquella yera encabezada por as organizacions culturals y en esfensa d’a luenga, en ista o papel alazetal d’ixas asociacions, a las que pertocaría prener a voz principal, ye radida y quasi inexistent.
En os zaguers meses, antimás, se ha ubierto a participación en a debandita Coordinadera a personas y organizacions que han contrimostrau, mientres a suya trachectoria politica y asociativa, estar destructivas tanto ta l’aragonés como ta lo movimiento en a suya esfensa, con una manca de tot d’etica y de leyaltat.
Por istos y atros motivos, deixamos a Coordinadera Aragón Trilingüe y creyemos que a luita de Puyalón de Cuchas por as luengas d’Aragón ha d’endrezar-se enta atros cabos. Ent’os camins que a Cucha Independentista y as suyas organizacions levan fendo decadas en o nuestro país. En fer conseguir que l’aragonés y o catalán tiengan reconoixida a suya existencia y dignidat, y que os dreitos d’os fablants, como individuos, colectivo lingüistico y parti d’o pueblo aragonés sigan reconoixius y puedan exercer-se librement, en todas as dembas y en particlar, en l’amostranza.
Manimenos o gubierno espanyol plega de reconoixer implicitament que no’n ye prou. De voz d’o suyo menistro d’educación Wert, ha catalogau a una amostranza en muitas millors condicions que no la nuestra, como una enrestida enta os dreitos d’os fabladors d’o castellano. As posibilidatz de dignificar as nuestras luengas en l’amostranza tamién sufren as enrestidas dende o gubierno espanyol.
Comunicau en catan |Comunicau en castellano.
Puyalón de Cuchas
