Recientment Puyalón celebró lo suyo VI Asambleya Nacional y dimpués de "catorce anyos de luita" zarró un ciclo pa "ubrir nuevos espacios pa seguir construyindo poder popular".
"Dende que en 2009 lo nuestro prochecto autonomo chitó a caminar hemos teniu periodos de creiximiento y ampliación d'as bases soberanistas y de cuchas, pero tamién hemos viviu momentos de retrocesos en un contexto cheneralizau de desmobilización y perda d'activos en o conchunto de fuerzas politicas y socials", afirma la formación d'a cucha soberanista aragonesa en una nota de prensa con motivo d'o 20 d'aviento.
Atura Puyalón ye "evident" que "nos trobamos debant d'un cambio de ciclo a lo cual tampoco no son allenas atras formacions aragonesistas y d'a cucha". "Lo contexto y panorama politico actual nos leva a concluyir que nos trobamos debant d'a fin d'una etapa y nos amana a la necesidat d'articular nuevos escenarios pa intervenir en a politica aragonesa", advierten.
Puyalón decidió adaptar la suya organización a "un nuevo ciclo" en o cual "la nuestra función como partiu politico se reconfigura, plantiando lo nuestro potencial colectivo como motor ideolochico", y per ixo "ubrimos lo nuestro treballo a nuevos espacios, chunto a atros interlocutores d'a cucha aragonesa pa abanzar en a transformación social y la emancipación nacional d'Aragón".
"Sin renunciar a las nuestras ideyas y prencipios soberanistas, socialistas, ecolochistas, feministas, internacionalistas y antifascistas, reiteramos la nuestra disposición a articular un espacio politico aragonés y progresista a lo servicio d'a clase treballadera y sectors populars", concluye la nota de Puyalón.
