Dende Purna "como organización feminista queremos fer visteras as desigualdatz y discriminacions que se dan por qüestion de sexo, y cómo o sistema patriarcal acompanyau d’o capitalismo mos oprime a todas as que somos difuera d’a norma. D’una man a las mullers y d’atra man a la resta de suchetos politicos que no s’achustan a las normativa heteropatriarcal, lesbianas, gays, transexuals, bisexuals, queers, asinas-asinas… Creyemos que a nuestra luita feminista ta concarar o sistema heteropatriarcal ha d’estar continua y ha de caminar d’a man con a luita contra o sistema capitalista y a luita de liberación nacional".
"Iste anyo ta ista calendada queremos meter ficancia en a ley de l’aborto d’o PP que retalla encara más os nuestros dreitos como mullers. O desembolique d’os dreitos conquerius por as mullers no ye linial, puet enantar o replegar-se a lo largo d’a historia, eixemplo platero d’isto ye o dreito d’a muller a decidir en a interrupción de l’embarazo. As aragonesas tenemos muito a decir en o tocante a isto, puesto que en zaguerías o gubierno ye propasando y fendo una reforma que retalla o dreito d’a muller a trigar librement. Se ye tornando a leis d’o pasau que advogan por una solución de 'supuestos' en cuentas de 'plazos'. A lei de supuestos ye una lei de raso obsoleta puesto que valura interrumpir l’embarazo nomás que en bells supuestos tasaus por lei (Violación, malformación…) y no pas en un plazo de 14 semanas dixando decidir a la muller as suyas causas ta interrumpir o embarazo. Ista nueva reforma torna ta la lei de supuestos derogada por a lei plazos aprobada por o gubierno d’o PSOE, y va más dillá, retallando más encara os supuestos en os que ye legal abortar. Dixando nomás os supuestos de violación y grau periglo ta la vida o la salut fisica o psiquica, quedando difuera o supuesto de malformación d’o feto", sinyalan en o suyo comunicau.
Ta Purna "ye platero que ista reforma no rispeta o dreito d’a muller a decidir sobre o suyo propio cuerpo y a suya propia vida, estando tamien una qüestión de clase. En o contexto economico actual por un costau retallan as aduyas a las personas dependients y por atro costau sacan o supuesto de l’aborto en caso de malformación, dato que tien repercusión dreita en as mullers de clase treballadera".
"D’atra man ye constatable que o numero d’abortos realizaus en os paises en que a interrupción de l’embarazo no ye legal, no ye más baixo que los que si que en ye. Manimenos que lo que se fan son un gran numero d’abortos ilegals sin as condicions y os meyos de salubridad necesarios. Ta forro y bota, cal decir que as mullers con más recursos economicos marchan t’atros países en os que si que ye legalizau l’aborto ta poder interrumpir o suyo embarazo, supuesto d’o que quedan difuera as mullers con pocos recursos", anyaden.
Dende Purna "demandamos que siga respetau o dreito d’as mullers a decidir sobre o suyo propio cuerpo y a suya propia vida y que l’aborto siga legal y de baldes".
"Por tot isto, convidamos a toda la chovenalla aragonesa a organizar-se y concarar o sistema heteropatriarcal que impera en a nuestra sociedat, por meyo d’a luita feminista!!", remata o suyo comunicau.
...
