Dende Purna, a chovenalla independentista y revolucionaria, lamentamos profundament a muerte fisica d’o comandante Hugo Chávez y queremos levar tot lo nuestro refirme a o pueblo venezolano. Dende Aragón somos con todas y totz vusotros, chirmanas y chirmans bolivarianos.
Chávez, como líder d’a revolución bolivariana, ha amostrau a o mundo que o socialismo ye posible en o sieglo XXI y ha reafirmau, una vegada más, que a revolución popular ye o camín t’a liberación d’os pueblos. Chávez ye a continación d’os grans liders latinoamericanos d’a historia (Guevara, Allende y Fidel entre atros); o zaguer d’aquells que siempre serán un eixemplo a continar ta todas as revolucionarias d’o mundo. Y como líder historico, o legau de Chávez, siempre será entre nusatras, en o caminar d’o pueblo venezolano y de todas aquellas que creyemos que un mundo más chusto ye posible.
Chávez estió capable de resistir a enrestida imperialista y amostró a o mundo que l’alternativa a o capitalismo ye posible. Dio a o mundo una lección de democracia y a pesar d’o bloqueyo economico, politico y mediatico, o president se mantenio fiel a os principios d’a revolución bolivariana y siempre conservó l’aimor y o refirme d’o suyo pueblo. Y que quede esclatero que a racada que Chávez ha dixau en a historia, no remata aquí, si no que o suyo legau continará vivo en todas aquellas que luitamos.
O millor homenache que podemos fer a Chávez y a todas aquellas que dedicoron a suya vida a la revolución ye continar en a luita por o socialismo y por a liberación d’os pueblos. Somos convencius de que o pueblo venezolano sabrá estar a l’altura d’ista situación y que continará bien firme. Dende Aragón, tos nimviamos toda a nuestra solidaridat y tos animamos a continar fendo camín, china chana, levando as ideyas d’a revolución bolivariana dica o final.
Dica la victoria siempre! Patria y socialismo u muerte! Chávez vive, a luita contina!
En Aragón, a 6 de marzo de 2012
Purna, a chovenalla independentista y revolucionaria
--
[Más información en el Especial Chávez en Telesur]
