Dende Purna, a chovenalla independentista y revolucionaria, queremos fer una crida a la choventut d’as redoladas mineras ta que secunde masivament a Vada Cheneral convocada o venient diya 18 de chunio en todas as cuencas mineras. Entendemos ista convocatoria como una chornada de luita por os dreitos y por l’esdevenidero d’o territorio que tien como obchetivo fer reblar a o Partido Popular en as suyas pretensionspor acotolar as aduyas a la extracción d’o carbón y a la reindustrialización. Purna se posiciona a favor d’as luitas obreras que en istas zagueras semanas han sosteniu os miners y que ha arroclau a buena parti d’a población d’as redoladas mineras. Creyemos que a Vada Cheneral, manimenos, convocada por os sindicatos amariellos CCOO y UGT, ye una buena traza de levar a luita d’un sector concreto a la resta d’a clase treballadera baixoaragonesa ta que a reivindicación principal siga la reindustrialización y un esdevenidero digno t’as redoladas mineras.
A chovenalla d’as cuencas se chuga en ista baralla contra o gubierno tot lo suyo futuro. Dende fa decenios a emigración ye l’unica surtida que ha teniu como conseqüencia d’a baixada d’o sector industrial y d’a falta d’inversión en o territorio. A luita d’os miners ye a luita de todas as redoladas por aconseguir una surtida a la suya malisma situación, o carbón hue ye l’unica guarancia de sustento ta mils de familias y en iste sentiu os y as chovens no tien que dandaliar en refirmar-lo. Con tot y con ixo, ye menester dotar a ista vada d’un conteniu reivindicatorio a largo plazo: o carbón tendrá que rematar mas luego que no tardi, y ye por ixo urchent a transformación d’o modelo industrial, enta uno respectuoso ecolochicament y que pueda sostener as redoladas afectadas. Isto no s’aconseguirá en un periodo curto de tiempo pues ye de dar que entre os intreses d’a oligarquía espanyola no se troba la reindustrialización, por ixo tien que estar toda la población, isto ye, toda la clase obrera d’as redoladas mineras, a encargada de levar a cabo una luita sostenida por a suya supervivencia a largo plazo. D’a mesma traza, tampoco no tien que estar as interpresas as que decidan a cuantía d’as aduyas t’o carbón, tot lo contrario, dende Purna demandamos que en o proceso de reconversión tot lo sector de producción enerchetica aragonés ha d’estar nacionalizau como guarancia ta un control obrero d’a reindustrialización.
Choven, o diya 18 luita por o tuyo esdevenidero, luita por l’esdevenidero d’a tuya redolada!
Purna, a Chovenalla Revolucionaria y Independentista
[Sigue la cobertura en La Haine y Kaos en la Red]
