Lo deputau de CHA-Sumar Aragón, y portavoz adchunto d'o Grupo Plurinacional Sumar en o Congreso, Jorge Pueyo, en comparecencia debant d'os meyos de comunicación en a plaza d'Aragón de Zaragoza este pasau luns, y usando de raso la luenga aragonesa, anunciaba que ha aconseguiu “recabar l'emparo economico d'o Gubierno d'o Estau espanyol a l'aragonés y a lo catalán d'Aragón”, en o marco d'o suyo treballo en o Congreso “pa contrarrestar la involución d'o Gubierno d'Aragón PP-Vox en materia cultural caracterizada per la censura”.
“Tiengo lo orgullo d'anunciar que hemos conseguiu que lo Estau reconoixca per primera vegada los dreitos lingüisticos d'os aragoneses y aragonesas, como viene fendo con atras comunidaz autonomas. Este martes s'apreba en Consello de Ministros una linia de financiamiento anyal de 100.000 euros pa las luengas d'Aragón que lanza un mensache bien claro: l'aragonés no rebla debant d'a censura de PP y Vox, y igual que impedimos que acabasen con o festival Periferias, impediremos que acaben con as nuestras luengas”.
Pueyo asegura que “lo Ministerio de Cultura va a destinar 100.000 euros a prochectos culturals en as luengas propias d'Aragón: aragonés y catalán d'Aragón. Lo ferá a traviés de dos subvencions nominativas en favor de l'Academia Aragonesa d'a Luenga y d'a Deputación de Zaragoza, que s'incluyen en o Real Decreto de prórroga presupuestaria que aprebará lo Consello de Ministros. Con esto, contrarrestamos la invisibilización y lo negacionismo d'o Gubierno d'Aragón enta las nuestras luengas: que ha eliminau Direccion Cheneral de Politica Lingüistica, que ha deixau sin fondos a l'Academia Aragonesa d'a Luenga, que ha negau la reconoixencia digna a las nuestras luengas. Per ixo, agradeixemos a lo Ministerio de Cultura la suya sensibilidat y lo suya emparo. Con esta medida i habrá fondos pa actividaz culturals en aragonés y en catalán d'Aragón, como las que se veniban amprando per la Direccion Cheneral de Politica Lingüistica”.
“L'aragonés ye patrimonio immaterial de toz los aragoneses y aragonesas, charren u no charren aragonés, pero tamién de tota la humanidat, y la nuestra forma sola de veyer y entender lo mundo. No tiene color politica, ye de toz y totas, y cualsequiera que ataque a las nuestras luengas ataca a tota la ciudadanía aragonesa. Haber conseguiu esto ye un orgullo, y va per toz aquels que ya no son y nos amostroron lo camín y ye fuent d'esperanza pa toz aquels a los cuals queremos legar ixe patrimonio”, ha afirmau lo deputau de CHA.
“Se fa un paso pa complir con o Estatuto, con a Constitución y con a Carta Europea d'as Luengas Minoritarias. Y ye triste que lo Estau tienga mas preocupación per lo patrimonio aragonés que lo propio Gubierno d'Aragón, secuestrato per las politicas de asimilacionismo cultural de Vox, que usa las luengas como arma politica. Y ye que, d'a mesma traza que lo denunciamos cuan belún usa lo patrimonio material como arma politica, no permitiremos que dengún lo faiga con o patrimonio immaterial”, concluye Pueyo.
