L’Asambleya Nacional Extraordinaria de Chunta Aragonesista (CHA) ha elechiu iste sabado en Alcanyiz a Jorge Pueyo como nuevo president nacional d’a formación con l’apoyo d’o 63% d’as personas delegadas en l’Asambleya. Finalment, a candidatura encabezada por Pueyo ha estau l’unica que s’ha presentau ta la presidencia de CHA. Asinasmesmo, a formación aragonesista ha decidiu que Verónica Villagrasa será la nueva secretaria cheneral d’a organización, ambas decisions en una chornada marcada “por l’ampla participación y o debate politico”.
A chornada ha prencipiau con un emotivo minuto de silencio en memoria de Joaquín Palacín, anterior president nacional de CHA, cuio recient falleiximiento ha motivau a convocatoria d’ista Asambleya Nacional Extraordinaria. “A militancia rende asinas homenache a la suya trayeutoria politica y a lo suyo compromiso con l’aragonesismo d’esquerras”, subrayan dende a formación.
Dimpués d’a suya eleción, Pueyo ha afirmau que asume o cargo “dende a responsabilidat que supone estar o nuevo president de CHA” y agradeixe “tot l’apoyo recibiu, l’emparo y a confianza depositada”, destacando “a necesidat de reforzar o prochecto aragonesista y d’esquerras en l’actual contexto politico”.
O nuevo president de CHA ha anunciau amás que, dende lo proximo lunes, va a prencipiar a treballar “con l’obchectivo de construyir l’alternativa aragonesista d’esquerras” de cara a las eleccions municipals de mayo de 2027. Pueyo ha subrayau que “CHA enceta una nueva etapa centrada en reforzar a organización, ampliar la suya base social y ofrir propostas utiles ta Aragón y os suyos municipios”.
Asinasmesmo, Pueyo tamién ha valorau os pactos entre PP y Vox en Extremadura, que ha calificau como “terribles”, y ha advertiu que “veyemos a lo PP pactando con qui atacan os dreitos humans y l’esencia mesma d’a democracia”. En iste sentiu, considera que ista estratechia “será o prencipio d’o fin politico de Jorge Azcón”, a la vegada que ha reafirmau o compromiso de CHA “con a defensa d’os valors democratics y de l’aragonesismo progresista”.
