Lo PSOE Alto Aragón ha tornau a exichir la obridura d'o Centro de Salut d'o Perpetuo Socorro de Uesca, “paralizado per l'interés d'Azcón. Falta dotar-lo de material, podrían haber-lo financiau con fondos propios si hesen quiesto. No teneban 200.000 euros u no los troboron en un presupuesto de mas de 3.000 millons?” s'ha preguntau lo secretario cheneral d'os socialistas altoaragoneses, Fernando Sabés.
Lo tamién portavoz socialista en as Corz d'Aragón ha criticau que “las obras concluyioron en tiempo y forma lo pasau mes de chulio y dende entonces los 30.000 vecins y vecinas que dependen d'este centro de salut son asperando. Lo Partiu Popular l'ha fiado tot a uns presupuestos inexistentes y a un gubierno hue inexistente. La sola certeza que tenemos ye que este edificio sigue zarrau”.
Sabés considera que esta situación ye “la millor muestra d'o total desinterés d'Azcón y de tot lo PP per l'atención sanitaria en a capital altoaragonesa. No nomás han frenau la obridura d'o centro de salut d'o Perpetuo Socorro, amás han zarrau lo Santo Grial sin enchegar la infrastructura alternativa que anunció Lorena Orduna, y han suprimiu personal en o Fidel Pagés y en o Hospital Sant Chorche”.
Dende 2023, ha anyadiu, “no i hai ni una sola buena noticia en materia sanitaria pa esta ciudat. Tot lo contrario, hemos visto cómo empeora la calidat asistencial, cómo se saturan las urchencias y los centros de salut, con asperas que en beluns d'éls superan las cuatro semanas de demora pa una cita en atención primaria”.
Bella cosa que, ha sinyalau Fernando Sabés, “tiene un solo beneficiario: los amigos d'Azcón, las empresas d'a privada, que aplauden a dos mans cada retalle que acomete lo PP perque los pacients acaban en as suyas clinicas, bien derivaus per lo especialista u bien perque buscan en un seguro privau lo que la sanidat publica ya no les ofreix”. Y ye que, asegura Sabés “s'han suprimiu enfermeras en o Fidel Pagés u Centro de Salut Pirineus en Uesca, en o de L’Aínsa u lo de Binéfar. Tamién s'han eliminau plazas de medico en Ayerbe u Almudévar. Lo que somos veyendo no son nomás retalles y privatizacions, ye una forma deliberada de minorar l'atención sanitaria a los altoaragoneses”, ha concluyiu.
