Lo PSOE de Balbastro denuncia que este pasau mierques, y per segunda vegada en pocos meses “la saturación d'as urchencias d'o Hospital de Balbastro ye obligando a derivar pacients a lo Hospital Sant Chorche de Uesca. Una situación de colapso inacceptable que vulnera lo dreito que tenemos os barbastrenses y os mas de 110.000 altoaragoneses que tienen este centro como referencia sanitaria”.
Seguntes asegura lo PSOE, la ciudadanía que requiere atención urchent “ye estando derivada a Uesca, tanto en o caso d'ingresos como de traslados en ambulancia, lo que contrimuestra que, tot y con as promesas electorals d'o PP, se ye desmantelando china chana este hospital. Y mientres, se sobrecarga de treballo atro centro hospitalario. Una situación que no mereixen ni los profesionals sanitarios ni los ciudadans”.
Lo Gubierno d'Aragón “sigue metendo en risgo con esta decisión un dreito esencial como ye una atención sanitaria publica, cercana y de calidat. No ye normal que, debant d'una urchencia medica, s'obligue a recorrer decenas de kilometros, que superan lo centenar dende cualques puntos, con o risgo que ixo conlleva pa la salut d'os pacients”, enfatizan dende lo PSOE.
Per ixo, exichen explicacions “immediatas” y que s'adopten “las medidas necesarias pa reubrir las urchencias d'o Hospital de Balbastro con os recursos humans y materials adecuaus pa atender a los pacients”.
“La sanidat publica no puede seguir pagando los retalles ni la falta de planificación d'o PP. La salut d'os nuestros vecins no ye negociable”, concluyen.
