ARREDOL | A interpresa se niega a negociar mientres a vada, que continará maitín. O ERE podría deixar sin treballo a 592 personas. Iste maitin un piquete informaba sobre o prencipio d’a vada en as puertas de l’edificio central que tien a CAI, una d’as caixas que forman Caja3, en o Paseyo d’a Independencia de Zaragoza. Ye o primer diya d’una vada convocada por os treballadors d’ista entidat, en protesta por l’ERE presentau por a interpresa, que podría deixar sin treballo a quasi 600 personas y zarrar 187 oficinas en integrar-se en Ibercaja.
Mientres tot lo miercols se mantenioron reunions entre representants d’a interpresa y d’os treballadors. Manimenos, dimpués d’as 3 d’o maitin continaba sin plegar-se en garra alcuerdo, por lo que a convocatoria de vada continó. Si no cambean as cosas, a vada continará tamién o viernes.
A interpresa, formada por a Caja Inmaculada, Caja Círculo y Caja Badajoz, s’ha negau a negociar mientres os diyas de vada, por lo que o conflicto pareix prou dificil de solucionar. De man d’os representants d’os treballadors se han demandau prechubilacions con o 90% d’o chornal, entre que a interpresaye ufrindo unas condicions bell poco millors que t’as entidatz intervenidas por l’estau como Bankia, Novagalicia y Banco de Valencia. Atro d’os entrepuces ta plegar en bell alcuerdo son as guarancias que demandan os treballadors de seguridat en os suyos puestos de treballo, ta privar de que se forachite a más chent en posteriors reestructuracions.
