O Seminario de Sociolingüistica Aragonesa compareció o zaguer 31 d'octubre martes pa informar en as Cortz d'Aragón sobre a situación de peligro en que se troba l'aragonés y o catalán en Aragón.
Tal y como Natxo Sorolla y Chabier Gimeno i explicoron, se ha contrimostrau que "as politicas educativas que en istas lechislaturas s'han aplicau en a escuela aragonesa", recordemos con a sola ensinyanza de castellano como luenga oficial, "han estau negativas de tot, y en o caso de l'aragonés espantosas". En a escuela aragonesa se contina negando l'alfabetización d'os parlants maternos d'aragonés y catalán, y os porcentaches d'analfabetismo d'as enqüestas asinas lo contrimuestran.
Istos datos, que o Seminario nos amostró en a sesión de comparecencia ciudadana, no fan que refleixar a perda de parladors que as dos luengas propias d'Aragón han sufriu en a zaguera decada. Un sinyal d'o peligro de desaparición, más que más de l'aragonés, pero también d'o descenso en l'emplego d'o catalán en a zaguera decada.
No entendemos como o PP contina negando unas politicas decididas, pa la conservación d'iste patrimonio lingüistico, y pueda enrestir contra la imposición d'unas luengas minorizadas por o simple feito d'estar amostradas en a escuela. Fernando Galve falta a la verdat quan diz que "la gente habla lo que quiere en la calle", tot tenendo dezaga un sistema educativo que niega a existencia d'ixa luenga y le niega la suya alfabetización en ella.