ARREDOL | As propuestas de l’equipo liderau por Pablo Iglesias han ganau por muito as votacions feitas mientres ista semana sobre os documentos etico, politico y organizativo de Podemos. 112.070 personas d’un total de 205.750 rechistradas han votau y han decidiu con un 80,71% emparar o modelo d’os documentos “Claro que Podemos“.
Mientres os zaguers diyas se charró muito d’a división interna de Podemos, sobre tot cuanto a modelo organizativo. Manimenos, o documento organizativo “Sumando Podemos”, avalau por as eurodiputadas Teresa Rdriguez, Lola Sánchez y Pablo Echenique, ha estau l’unico que ha conseguiu blincar o 3% d’emparo en as votacions, plegando en un 12,37 %. Toda la resta d’opcions han recibiu menos d’un 3% d’os votos.
Dende agora, s’ubre un proceso a on que as personas rechistradas en Podemos habrán de esleixir a o secretario cheneral y a las 63 personas que ferán parte d’o “Consello Ciudadano”, organo de dirección entre asambleyas. Iste organo se completará tamién con 17 “secretarios autonomicos”. Ta trigar a ixas 63 personas se ferá servir un sistema de listas ubiertas.
Atra d’as decisions que s’ha preso en aprebar istos documentos, ya la de que Podemos no se presentará con as suyas siglas a las eleccions municipals que bi habrá en mayo en tot l’estau. Sí que lo ferá “como parte de candidaturas d’unidat popular”, en clara referencia a procesos de compleganza como Ganemos. Cuanto a las eleccions t’os parlamentos autonomicos, Podemos sí que se presentará con o suyo nombre.
Dimpués d’una semana a on que dende muitos medios se ha charrau de división interna, Podemos ha quiesto dar sinyals de unidat arredol d’os documentos aprebaus. Carolina Bescansa, de l’equipo de Pablo Iglesias, ha deixau claro que “en Podemos no sobra dengún”. Dende l’equipo de Echenique, ell mesmo tuiteaba “A chent lo ha deixau claro. Continamos treballando. Continamos sumando fuerzas t’o cambio social”. O suyo equipo feba un comunicau tamién a on que aseguraban que “hue más que no nunca somos dispuestos a asumir a leyaltat ya responsabilidat graniza que tien Podemos debant”.
