ARREDOL | Os Diaples d’a Uerba, una d’as collas culturals más populars d’Aragón, ye celebrando as suyas vinte anyadas fendo mosica y fuego por tot lo país y dillá d’as mugas aragonesas. Iste sabado han programau en Zaragoza un 'diya de l’argüello diaple' a on que ferán conoixer a suya faina mientres todas istas anyadas antimás de pasar un buen ratet con os suyos seguidors.
De maitins, l’acción será en a marguin dreita de l’Ebro, entre os puents de Fierro y d’As Fuents, a on que bi habrá chuegos tradicionals aragoneses. Podrá participar-ie tot qui se i amane.
De tardis, en o local Treziclo, se ferán quate chicotas charradas. Jesús Rubio charrará sobre a recuperación d’o baile d’os salvaches de Benavarri, Chusé Aragüés sobre “Como se forma a luenga aragonesa”, Chesús Casaus sobre “Os diaples en a cultura aragonesa” y rematarán Carlos Casamián y Chuan Burriel con una charrada sobre o “Prencipio, realidat y actualidat de Diaples d’a Uerba”.
Dimpués d’un chiquet descanso, a chornada rematará con a prochección, a las 20.00 horas en o local Treziclo de “A leyenda d’o Diapleron” y as primers imachens d’o documental sobre os “Diaples d’a Uerba”.
