Con motivo d'o 20 d'aviento, Día d'os Dreitos y Libertaz d'o Lugar Aragonés, once organizacions aragonesistas han presentau un manifiesto conchunto pa reivindicar la figura de Juan de Lanuza, Chusticia d'Aragón, y la Rebelión de 1591 contra la monarquía hispanica, asinas como la defensa historica d'os fueros frent a lo despotismo.
Chunta Aragonesista, Alazetal, CUT, Estado Aragonés, Fundación Gaspar Torrente, ISTA, OSTA, Partido Carlista de Aragón, Rolde de Estudios Aragoneses, AC Rebellar y SOA sinyan un texto que replega diez puntos clau, centraus en democracia, autogobierno y chusticia social.
Entre las reivindicacions destacan lo dreito a decidir d'o lugar aragonés sobre lo suyo futuro politico, economico y social; la creyación d'una Hacienda propia, que "permita administrar, recaudar y chestionar los nuestros recursos dende Aragón, guarenciando un financiamiento estable y un reparto mas chusto"; y un marco aragonés de relacions laborals que priorice la vida digna frent a lo beneficio.
Lo manifiesto tamién reclama la cooficialidat de l'aragonés y lo catalán perque "Aragón ye un país plurilingüe". D'o mesmo modo, desfienden lo dreito a la vivienda per medio de politicas publicas de alquiler, la defensa d'os servicios publicos frent a retalles y privatizacions, y la reobridura plena d'a linia de tren de Canfranc como eixe estratechico de mobilidat y connexión europea.
Asinas, se reclama tamién un emparo activo a lo mundo rural pa frenar la despoblación, la protección y actualización d'o Dreito Foral Aragonés, y la derogación simbolica d'os Decretos de Nueva Planta como reconoixencia d'a inchusticia historica y afirmación d'a vichencia d'os dreitos historicos d'Aragón.
"Cada 20 d'aviento renovamos lo compromiso con as libertaz per qui luitoron per Aragón. Que este manifiesto sía una clamada a decidir y desfender lo nuestro país con dignidat y esperanza", sinyalan las organizacions firmantes en o texto.
