Quan faltan tasament 10 diyas ta que prencipie o “Esfendemos a Tierra 2013” y con a calor regalando l'asfalto, resulta refrescant escuitar o ska alegre d'ista combativa colla.
Diablo Cojuelo ye una banda castellana -Madrit- que fusiona ska, reggae y punk rock con instrumentos tradicionals Castellans como a dulzaina u l’acordeón diatónico y que dimpués de 7 anyos d’andadura mosical publica agora o suyo primer disco en estudeo clamau “Surcos”.
Gravau y mezclau a zaguers de 2012 y prencipios de 2013 en os Estudios Oasis en Madrit baixo os mandos de Manolo Arévalo y Kosta Vazquez (Boikot, Sonora, Grass). Un disco con 9 temas cargaus de ritmos y melodías que enzurizan a mover os pietz con o caracteristico sonido d’a banda y letras que convidan a revelar alegrement y a construir dende lo positivo d’as cosetas y que amás conta con a colaboración de Juankar vocalista de Boikot y Cuchi de 33 Malandras a la trompeta.
Prencipia o disco a ritmo de ska revolucionario dedicau a las mareas ciudadanas, ta continar con un homenaje a lo antigo convidando-nos a meter-nos a boina y viachar asi de tornada a las radices de forma divertida con una chicota composición de percusión tradicional con un pandero quadrau, una pandereta y un arrabel madrilenyo.
Seguimos con “Surcos” que da titol a o disco, un reggae muit bailable y una metáfora sobre a situación actual en el qual nos trobamos. “En o pozo” a ritmo de punk rock cuenta con a colaboración de Juankar de Boikot a la voz y fabla d’a luita d’os miners, tomando unas estrofas d’o famoso himno d’os miners “En o pozo Maria Luisa”. “Villalar” fabla sobre a fiesta que se celebra en dito lugar y que recuerda la caída d’os Comuneros de Castilla y en el qual Cuchi de 33 Malandras colabora a la trompeta ta continar con “O sentiu común” un reggae combativo con toques raggamuffin. Seguimos con “Africa” un reggae-cumbia y con l’acordeón como protagonista ta dar paso a “Tierra Mullada” unatro reggae dulce sobre as cosetas buenas d’a vida, y ta rematar un tema reivindicativo a las claras “Planeta radio”.
En definitiva un disco y una banda con un sonido alegre y combativo que no te deixará indiferent como ells mesmos dicen: “Dende o corazón de Castilla: Ska reggae rock rebelde y combativo ta un Pueblo libre”.