O Diya d’os Dreitos y Libertatz d’Aragón pleno de actos reivindicativos y culturals

En amanar-se lo cabo d’anyo de l’asesinato de Chuan de Lanuza “O mozo”, Chusticia d’Aragón, o 20 d'aviento de 1591, por orden de Felipe II de Castiella, as organizacions nacionalistas y independentistas d’Aragón paran os suyos homenaches y actos cargaus de contenius culturals y reivindicativos. Iste 422 cabo d’anyo plega con un ambient más furo que no atras ocasions. D’una man a posibilidat ubierta por o gubierno de l’Estau espanyol de sacar a figura d’o Chusticia, que ha provocau queixas en buena parti d’a sociedat aragonesa, declaracions en contra de Puyalón, CHA, IU y PAR y o prencipio d’una campanya …

derechos
Juan de Lanuza, Chusticia d Aragón.

justicia de aragon chusticia d'Aragon estreladaEn amanar-se lo cabo d’anyo de l’asesinato de Chuan de Lanuza “O mozo”, Chusticia d’Aragón, o 20 d'aviento de 1591, por orden de Felipe II de Castiella, as organizacions nacionalistas y independentistas d’Aragón paran os suyos homenaches y actos cargaus de contenius culturals y reivindicativos.

Iste 422 cabo d’anyo plega con un ambient más furo que no atras ocasions. D’una man a posibilidat ubierta por o gubierno de l’Estau espanyol de sacar a figura d’o Chusticia, que ha provocau queixas en buena parti d’a sociedat aragonesa, declaracions en contra de Puyalón, CHA, IU y PAR y o prencipio d’una campanya ta que no se torne a “tallar o tozuel a o Chusticia”. D’atra man, l’anuncio d’o referendum soberanista en Catalunya afunda en os problemas d’estructura estatal y d’identidatz nacionals de l’Estau.

Fundación Gaspar Torrente, vinclada a Chunta Aragonesista, ha organizau qualques actos en istos diyas d’antis d’o 20 d’aviento.  As actividatz en esfensa d’os dreitos y libertatz d’Aragón prencipiaron iste miercols con a presentación d’o numer 10 d’a revista El Ebro, en o Centro Cultural de Las Armas de Zaragoza. En a revista se i pueden leyer articlos sobre a Reforma de l’Administración local, a realidat trilingüe aragonesa u nuevas alportacions sobre l’orichen d’o nacionalismo aragonés.

En Uesca, en a siede de l’Instituto d’Estudios Altoaragoneses, Mark Demesmaeker, diputau flamenco de l’Alianza Libre Europea –ALE-, fació la charrada “Confederalismo en la Unión Europea“. En a mesma chornada o Ligallo de Redolada d’a Plana de Uesca de CHA homenacheo a la Plataforma en Esfensa d’a Escuela Publica de Uesca. As chornadas rematan hue con un acto d’homenache a Chuan de Lanuza, a o canto d’a suya estatua en a Plaza Aragón de Zaragoza, y un concierto de La Ronda de Boltaña en o Centro Cultural Las Armas de Zaragoza.

Dende l’independentismo de cuchas son convocadas dos concentracions por o movimiento soberanista En a tuya man. En Chaca se ferá hue, diya 20, a las 19.00 en o Paseyo Constitución, entre que en Zaragoza, a cita será a las 12.00 d’o diya 21, en a puerta d’a Diputación de Zaragoza. En a convocatoria, En a tuya man esfiende que “no podemos quedar-nos sin fer cosa debant d’a enrestida recentralizadera d’o gubierno d’o PP” y que en “en a nuestra man” un listau d’obchectivos como “a soberanía economica, conseguir un marco propio de decisión, esfender as nuestras luengas u destinar más medios a potenciar una educación, cultura y sanidat publicas, entre atras propuestas. Ta ista convocatoria se i han sumau organizacions independentistas como Purna, A Clau Roya, SEIRA, A Enrestida u Puyalón. Iste partiu, antimás, ha feito publico un comunicau apostando por una compleganza en a movilización soberanista.

O partiu Estau Aragonés ha convocau tamién un acto de homenache o domingo 22 d’aviento a las 13.00 debant d’a placa que remera l’asesinato d’o chusticia y a dentrada d’as tropas castellanas en Aragón, chunto a lo Mercau Central de Zaragoza, amán d'o nuevo memorial en carrera Manifestación. OSTA, (Organización Sindical de Treballadors d’Aragón) tamién convoca atro homenache, iste chunto a lo monumento d’a Plaza Aragón, o 20 a las 9.20, denunciando “l’actitut centralista de Madrit” y esfendendo “un modelo d’estau que reconoixca toda la diversidat y plurinacionalidat de l’Estau espanyol”.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de nuestra política de cookies, pincha el enlace para más información.

ACEPTAR
Aviso de cookies