ARREDOL | Por primer vegada s'aconsigue conformar un faz d'antimateria. A sintesi se produció en a instalación d’o Gran Colisionador d’Hadrones (GCH) que se troba en Suiza, dimpués que os fisicos liberasen d’una acumuladora un numero determinau de positrons y los mezclallasen con un chorro d’antiprotons de baixa enerchía. Dimpués os antiatomos se desplazoron guidaus por o descendent campo electromagnetico que exerceba a mayor fuerza sobre ells mientres o experimento.
Dende noviembre de 2010 han resultau con exito diversas prebas d’a mesma mena, con cantidatz suficients d’antihidrocheno obtenidas, pero nunca no s’heba conformau un faz y en a mayoría d’os casos as particlas se desintegraban de camín. En chunio de 2011 os scientificos aconsiguioron estabilizar por uns 16 menutos decenas d’ellas dentro d’un espacio amugau por o campo electromagnetico. Manimenos, a mesma fuerza electromotriz obstaculizaba o estudeo d’as propiedatz fisicas d’os antiatomos y a suya interacción entre ell.
Disparar iste faz suposa un gran trango enta debant, dicen os expertos, que comparten o suyo argüello con os lectors d’a revista ‘Nature Communications‘. Destacan especialment l’aportación que fació en o experimento a nueva trapa d’antiprotons chaponés, Musashi, que los enfría con un fluixo d’electrons y los comprime con o campo electrico chiratorio dica que forman un cilindro virtual. Dende iste experimento, baltizau ‘Asacusa‘, o CERN tardará anyos en procesar os datos rechistraus por as trapas de particlas, os espectroscopios y atros dispositivos que rodioron a iste chorro fugaz d’antimateria.
