Comunicado d´o Bloque Independentista de Cuchas (A Clau Roya, A Enrestida, Purna, Puyalón de Cuchas y Universidat).- Hue 12 de setiembre, a organización d'a cucha revolucionaria Occitana, Libertat, y o conchunto d'a cucha independentista aragonesa agrupada en o Bloque Independentista de Cuchas queremos recordar ista calendata tant sinyalada en o seno d'os nuestros pueblos.
Occitània y Aragón son dos Pueblos que comparten sieglos d'historia, y ye que entre decenios funcionoron como un mesmo pueblo. No ye d'extranyar, dau que a cordillera pirenaica, encara que pueda pareixer que los desepara en lo fisico, en verdat los amana y propicia que as influencias d'uns sobre atros y viceversa se den en multitut de factors. A diya de hue i hai prou aspectos que compartimos, estando a historia en comun d'os nuestros pueblos uno d'os lazos d'unión mas importants.
O 12 de setiembre de 1213, soldaus Occitans y d'a Corona d'Aragón libroron debant de l'exercito francés una d'as batallas que habría de decidir o mapa Europeu d'ixa espuenda. Iste enfrentamiento, que tenió puesto en un planerón d'a localidat de Murèth, a bells dotze kilometros a o sud de Tolosa, estió a zaguera en la quala yera posible esfender a independencia d'Occitània d'a conquista d'o rei de Francia. Contra tot pronostico, l'exercito Occitán-Aragonés perdió a batalla, morindo en a mesma de 15.000 a 20.000 personas, entre ellas o Rei d'Aragón, Pedro II.
O desastre en a batalla de Murèth y a l'arreu o tractau de Corbeil (1258) significoron a fin d'a relación politica d'a Corona Aragonesa con tierras d'Occitània. Pero no a fin d'a relación entre a población d'istos dos Pueblos. Fruto d'as alteracions de 1591 y os Decretos de Conquista de 1707, Aragón tamién desapareixió como ente politica soberana y prencipió a sufrir igual como a Occitania conquerida por os franceses. Una lenta pero inexorable perdida d'a suya cultura, a suya luenga, a suya historia y a suya identidat como Pueblo.
A día de hue, l'Occitano y l'Aragonés sufren a discriminación d'os estaus francés y espanyol. Denigrando as luengas propias d'os nuestros territorios y forzando istas a la suya desaparición. Veyemos como os territorios sufren a explotación, en o más puro estilo colonial, d'os suyos recursos naturals, relegando a la población a simples espectadors d'a destrucción d'a suya tierra.
En o 800 aniversario d'a batalla de Murèth no cal fer acordanza soque d'a efemeride d'un capítol oscuro d'a nuestra historia, sino que s'ha de fer servir ta reviscolar as viellas alianzas d'os nuestros Pueblos. Solament asinas podremos enfrentar en común o colonialismo d'o nuestro tiempo, en o qualo os antigos reis despotas van hue acotraus de “traje y corbata” u participan d'a OTAN y o FMI.
A Occitans y Aragoneses mos cal conformar un frent de luita ta salir d'os nuestros respectivos marcos estatals ta asinas poder articular de conchunta con más Pueblos un eixe de luita común. Ye hora de rescatar viellas alianzas y encarar chuntos un nuevo escenario an poder ser Pueblos Libres.
