Amistaz, familiars, chents d'a cultura y l'arte, Aragón ye un país mas triste sin Ánchel, pero sabrá plorar la pena d'a suya ausencia recordando lo suyo legado, amando la vida, y si ye en aragonés mas vida encara.
L'Academia Aragonesa d'a Luenga ha publicau: muere l'academico Ánchel Conte Cazcarro (1942-2023). L'academico Ánchel Conte Cazcarro (Alcoleya de Cinca, 1942) ha muerto esta pasada nueit en Almería, a los uitanta y un anyos, dimpués d'un empioramiento d'a suya malotía respiratoria. Esta circumstancia, que ha limitau prou la suya mobilidat en os zaguers meses, no li ha privau de cumplir con ilusión y entusiasmo con as suyas obligacions academicas. Ánchel Conte ha estau miembro d'a institución normativa dende la suya constitución en 2021. Estió eslechiu, per unanimidat, director de l'Instituto de l'Aragonés, y presidió los treballos d'a Comisión de Grafía que levó enta la elaboración y aprebación d'a ortografía normativa de l'aragonés, un treballo d'o cual se sentiba muit argüelloso.
Escritor, historiador y etnografo, Ánchel Conte exerció como catedratico d'instituto dica la suya retreta. Conte yera una voz clau en a literatura moderna en aragonés. La suya obra s'han traduciu ta lo ruso, castellano, francés, euskera y asturiano, y ha publicau amás poemas y cuentos en revistas y atras obras colectivas. Ha estau, amás, una figura sinyalera en o movimiento de recuperación de l'aragonés, estando fundador d'entidaz como lo Consello d'a Fabla Aragonesa u la Sociedat de Lingüistica Aragonesa.
Dende la Sociedat de Lingüistica Aragonesa, entidat d'a cuala estió president, asinas han quiesto recordar-le: se’n ye ita una persona fundamental n’a dignificacion de l’aragonés en Sobrarbe, e, per extension, en tot l’Alto Aragon. Aquers anyos que Ánchel fue profesor en L’Aínsa, es alumnos del Viello Sobrarbe, la Fueva, l’Alto Cinca e altras tierras entre l’Ara e el Cinca sintioren que una voz distinta s’interesava per la suya voz desatendita, e que la feva suya. Sintioren no només cómo l’aragonés se veyeva dignificato, seno, sobre tot, cómo retrobavan l’autoestima, l’honor, heredato d’es ancestros, de comunicar-se en ixa lengua milenária, que a duras penas pervive encara.
Ánchel Conte fue el primero a reivindicar no només la lengua, seno tamien la cultura del Sobrarbe, el suyo folclore, la suya musica, la gaita sobrarbenca e las danças que l’acompanyavan, n’a lengua que las inspirava. Tornó l’autoestima.
Siempre tenió un esprito critico, siempre miró de distanciar-se de tot modelo de lengua monolitico, per més que ixe treballo se tornava difícil en tiempos d’uniformizacion. Con Ánchel Conte se’n ye ito tamien el que fue primer president de la Sociedat de Lingüistica Aragonesa (SLA) entre es anyos 2004 e 2005.
Con estas línias queremos honrar la suya memória e la suya contribucion, en nombre de la SLA e de toz e cada un d’es qui encara mantienen viva e genuina la lengua.
En a pachina web d'a editorial Xordica puede leyer-se una breu biografía: doctor en Istoria, fundador d’Andalán e d’o grupo folclórico Viello Sobrarbe, ye la figura impreszindible d’a literatura contemporania en aragonés. Ha publicato es poemarios No deixez morir a mía voz (1972), O tiempo y os días (1996), Zaga o mar o desierto (2002) e Luna que no ye luna (2014). Como narrador ye autor d’os libros de relatos O rafe d’o espiello (Xordica, 1997), De ordo sacerdotalis (Xordica, 2004) e las novelas O bolito d’as sisellas (Xordica, 2000) e Aguardando lo zierzo (Xordica, 2002) –Premio Ziudat de Balbastro 2002–, traducida a lo castellano, francés e ruso.
Tamién dende Nogará han quiesto recordar a Ánchel: se nos ne ye iu uno d'os pais de l'aragonés, figura imprescindible d'a suya recuperación y, prou que sí, d'a suya literatura. Colaborador con a nuestra asociación, y inspirador de cuantos artistas musicals y literarios. Que a tierra te sía leve!
Dende lo Gubierno d'Aragón recuerdan en a suya web de Cultura que en mayo de 2009 se le concedió la Medalla a lo Mérito Cultural per la suya larga trayectoria en o estudeyo, divulgación y defensa d'o patrimonio cultural popular, especialment d'a luenga aragonesa.
Dende Ligallo de Fablans de l’Aragonés y la Fundación Aragonum, tamién han expresau lo suyo pesar: somos trencatos de dolor, tristes e de raso apenatos. Nomás queremos plorar y abrazar a ra suya familia y tamién a tota ra familia de l’aragonés, d’a lengua aragonesa porque hué somos toz un poquet más popiellos. Se’n ha ito Ánchel, uno d’os padres d’a recuperación d’a lengua aragonesa y d’o suya renaixedura en os años 70 d’o siglo XX.
En 1968, cuan os tiempos no yeran precisament proclives a escribir en lenguas que no estasen o castellano, Ánchel publicó “Yaya Andresa”, un contet que podríanos afirmar que estió a primera obra en aragonés común. Encara que Ánchel yera doctor en Cheografía e Historia y, de feito, a suya vida laboral siempre estió como profesor en un instituto dica ra suya chubilación, Ánchel siempre contimostró pasión por a lengua y os temas altoragoneses. Pero sobretot vendría en 1972 ixe libro que ye una absoluta fita fundacional d’a literatura contemporanea en aragonés: “No deixez morir a mía voz”, un chilo que nos identifica y nos une a toz os que aimamos l’aragonés. Tamién coautor de “El aragonés, identidad y problematica d’una lengua” (1982), “O tiempo y os días” (1996), “O rafe d’o espiello” (1997), “O bolito d’as sisellas” (2000), “E zaga o mar o desierto” (2002), “Aguardando lo zierzo” (2002), “Luna que no ye luna” (2014) o “Digo sinse dicir” (2017), entre atras.
Estió miembro fundador d’o Consello d’a Fabla Aragonesa en 1976. Y entre os suyos numerosos premios literarios y distincions, destacamos a Medalla a o Mérito Cultural d’o Gubierno d’Aragón, (2009). En 1991 tamién recibió o nuestro homenache, lo d’o Ligallo de Fablans de l’Aragonés, en “L’Aragonés en a carrera”. Y en 2021, Ánchel estió nombrato academico de numero de l’Academia Aragonesa d’a Lengua y director de l'Instituto de l'Aragonés.
Ánchel, una vegata más, queremos reconoixer y agradeixer o tuyo formidable treballo. Allí a on sías muitas gracias de corazón y que no s’amorte nunca ra tuya voz y ra tuya palabra.
Tamién lo Consello d'a Fabla Aragonesa s'ha despido d'Ánchel, con un breu tuit:
Ánchel Conte Cazcarro (1942-2023). D.E.P. pic.twitter.com/EcQyjNO07D
— Consello_CFA (@cfa_consello) November 23, 2023
