Iste chueves 27 ye Chueves Lardero u Choricet, día que sinyala l'inte de surtida d'as garrastolendas u carnavals. En ista calendata, a chent gosaba salir t'o campo a minchar y soltaban bimardos encletaus improvisaus de tardes, quan o sol yera cacho y se feba de nueit se celebraba o baile d'esfraces. Encara hue, más que más en os lugars, se'n fa alcordanza d'iste día con brendas y entropans de lenguaniza. D'astí a mazada “Chueves Lardero, lenguaniza en o puchero”.
Pa os d'Alcanyiz ye una d'as fiestas más importants de l'anyo, pero pa os de Sant Per de Calanda y atros lugars d'Aragón ye agora una fiesta más y no implica deixar de treballar u d'ir ta la escuela. En belsetán se diz Hueves Larder, en benasqués (una d'as pocas parlas altoaragonesas actuals que conserva a denominación aragonesa d'os días d'a semana), se diz Chous Llarder, y en Campo Chous Gras. En Alcanyiz u Sant Per de Calanda se clama Choricet.
Lardero significa “referent a la graixa animal” y ye un adchectivo que se relaciona con o substantivo lardo, parola que presenta diferents significaus en l'Alto Aragón, totz relacionaus con a graixa, a l'egual que l'adchectivo gras(o) d'a denominación campesa.
Estianyo, Nogará Religada lo celebra en A Enrestida, gallizo Sant Cristóbal de Zaragoza, a ixo d'as 21.00 horas. Y, profes, bi habrá opción vegana.
