ARREDOL | O expresident d’a Republica francesa, Nicolas Sarkozy, ha estau deteniu ista maitinada en o marco d’a investigación d’un caso de trafico d’influencias que realiza a fiscalía anticorrupción. Dimpués d’o 26 de febrero, Sarkozy ye en o centro d’a investigación chudicial que tamién tracta d’un caso de violación d’o secreto d’instrucción. Sarkozy ha estau tresladau a las ueito d’o maitín a la Oficina central d’a luita contra a corrupción y as infraccions financieras y fiscals en Nanterre ta estar interrogau. A policía chudicial investiga si Sarkozy teneba un ret d’informadors dentro d’o sistema chudicial que le ofriba datos sobre os procesos chudicials que lo podeban afectar.
L’advogau de Sarkozy, Thierry Herzog, estió interrogau ahiere de conchunta con o chuez Gilbert Azibert y l’advogau cheneral d’a camara criminal d’a Cort de casación, Patrick Sassoust. Os tres hombres fuoron interrogaus en o marco d’a mesma investigación.
Seguntes explicó Le Monde o 8 de marzo, os investigadors acazan un ret d’informadors d’a policía y a chusticia que presuntament filtroron información a familiars d’o expresident francés en os procedimientos legals en que ye embrecau.
As sospeitas empecipioron en una investigación penal por corrupción encetada a primavera de 2013 a mans d’os chueces Serge Tournaire y René Grouman sobre o posible emparo financiero d’a Libia de Gadafi a la campanya presidencial de Sarkozy en 2007.
Por ista investigación, os investigadors sozmetioron a ascuitas telefonicas a o exchefe d’estau dende setiembre de 2013. Y son istas ascuitas as que reveloron que Sarkozy recibiba información sobre as investigacions que lo embrecaban.
