Este 23 d'abril, Día Nacional d'Aragón, y como cada 23 d'abril, diversos colectivos, asociacions, sindicatos y partius politicos aragonesistas se manifestoron en Zaragoza –salindo dende la DPZ pa recorrer lo Paseo Independencia– pa rematar chunto a lo Monumento a lo Justiciazgo en a Plaza Aragón de Zaragoza con un acto d'homenache a la bandera aragonesa y la lectura d'un manifiesto, a cargo d'Olga Aguirre, Julia Cortés y Leyre Valero. "Ni oblidamos, ni callamos. Desfendemos la memoria historica y las luengas d'Aragón", reivindicoron Alazetal, Estado Aragonés, CUT, Renaxer, Aragón Despierta, OSTA, ISTA, Fundación Gaspar Torrente, Partido Carlista de Aragón, Rolde de Estudios Aragoneses y Chunta Aragonesista.
En representación de "organizacions diversas y manimenos unidas en a defensa d'os intereses d'a nuestra tierra", Alazetal, Estau Aragonés, CUT, Renaxer, Aragón Dispierta, OSTA, ISTA, Fundación Gaspar Torrente, Partiu Carlista d'Aragón, Rolde de Estudios Aragoneses y Chunta Aragonesista se reunioron nuevament este 23 d'abril pa celebrar lo Día Nacional d'Aragón. Un 23 d'abril "en o cual recordamos la nuestra profunda identidat como lugar, naixida d'os nuestros antigos fueros, lo Chusticia, los grans churistas, la concordia, lo pacto...", per ixo no querioron deixar pasar este día "sin reivindicar que se reconoixcan los nuestros dreitos historicos y libertaz, tantas vegadas negaus per lo españolismo centralista, ya que no ye posible garra cambio estructural sin que estes remaneixcan en primer plano".
La manifestación para la defensa de la lengua y la memoria llega al monumento al justicia... #dianacionaldearagon pic.twitter.com/V5V6bAM3qI
— Mary Carmen Bozal 💜 (@mcbozal) April 23, 2024
"Una celebración la nuestra que no ha de limitar-se a un solo día: agora mas que nunca, toz los días hemos de reivindicar-nos como nación aragonesa; no podemos ixuplidar la nuestra identidat de lugar milenario. Perque agora mas que nunca hemos de desfender-nos d'os ataques que pretenden tornar a un Estau espanyol centralista. Las fuerzas politicas d'extrema dreita, de dreita y mesmo de supuesta zurda, quieren acabar con as identidaz propias, con a diversidat que ha sabiu convivir entre sieglos d'historia común", afirmoron en o manifiesto. En este sentiu, sinyaloron que "hemos d'estar en constant alerta, en modo de defensa, no podemos baixar la guardia perque quieren fer-nos retroceder en dreitos conquerius con muito esfuerzo y sacrificio".
"Tenemos un gubierno d'Aragón que niega la violencia machista, que ataca a lo feminismo, que promueve l'odeyo y la xenofobia a las personas migrants, que ataca los dreitos d'as personas LGTBI, que quiere destruyir la nuestra identidat propia aragonesa, que niega las luengas que se charran en Aragón y quieren privar que s'escriba la historia real d'a memoria democratica, perque pa éls nomás vale lo discurso franquista que se construyió en os cuaranta anyos de dictadura". Asinas recordoron que lo pasau 20 de noviembre lo Gubierno PP-Vox-PAR anunció la derogación d'a lei de memoria democratica, "lo facioron con saña anyadida, fendo-lo coincidir con a calendata d'a muerte d'o dictador". "Totas y toz los aquí presents sin excepción, creyemos firmement en que ye una lei que estió creada pa zarrar definitivament feridas ubiertas y que remanisen curadas pa siempre, nunca como lo traste de confrontación que beluns malintencionadament han quiesto veyer", remarcoron pa visibilizar lo preámbulo d'a lei ya derogado: "Construyir la memoria democratica a partir d'a memoria d'o pasau y d'o mas rigoroso conoixencia historico ye lo modo mas firme d'alimentar la nuestra democracia d'os prencipios eticos y morals que la fortalecerán frent a los discursos d'a exclusión y la intolerancia, d'asegurar en definitiva lo nuestro futuro de convivencia y paz. Ye imprescindible, en ixe sentiu, recordar y homenajear las vidas y las experiencias d'aquellas personas que s'esforzoron per aconseguir y desfender en Aragón un rechimen democratico".
Con a lectura d'o manifiesto, continoron reivindicando que "milars d'aragoneses y aragonesas luitoron per un mundo mas libre y no podemos deixar que tornen a estar ixuplidaus en as cunetas. Perque la suya dignidat y lo sentiu d'o suyo luita d'antes mas han d'inspirar-nos debant d'os desafíos d'o present". "Desafíos como lo que toz los abances que s'han aconseguiu entre anyos y, sobre tot, en os zaguers anyos, pa desfender las nuestras luengas propias, #le los han cargau d'un plumazo. Les dan igual las leis: lo president d'o Gubierno d'Aragón –Jorge Azcón– ha decidiu que aquí nomás se charra castellán; lo catalán y l'aragonés no existen".
Pa Alazetal, Estado Aragonés, CUT, Renaxer, Aragón Despierta, OSTA, ISTA, Fundación Gaspar Torrente, Partido Carlista de Aragón, Rolde de Estudios Aragoneses y Chunta Aragonesista, "este ye un ataque que no podemos deixar pasar". "Nos tornan a mandar a las trincheras, pero no imos a deixar que nos venzan: hemos de reforzar-nos en toz los ambitos, en as nuestras organizacions y emparando a totas las organizacions que desfienden las nuestras luengas", anyadioron. Pero "tamién hemos de desfender los nuestros dreitos socials y laborals, desfender la calidat d'os servicios publicos pa aconseguir gradualment, un cambio de modelo, en o cual los aragoneses y aragonesas podamos decidir, per nusatros mesmos, lo modelo politico, social y economico que deseyamos".
En este sentiu, abanzoron que "tenemos que movilizarnos pa aconseguir una Carta de dreitos socials pa Aragón, que supose un nuevo modelo social y economico pa lo nuestro territorio, en o cual sía encuadrau un Marco Aragonés Propio de relacions laborals y socials". "Hemos viviu entre estes meses y somos vivindo hue las chustas protestas d'o campo aragonés y los problemas socials y ambientals que desafían la chestión de l'alimentación. Estas protestas son asociadas a un modelo economico que busca beneficiar a los diners y no a la vida, en o cual lo chicot agricultor y distribuidor son grans perchudicaus asinas como tamién la permanencia d'a población en o meyo rural", continoron.
"Que nos ascuiten toz los sentius, que dengún caiga en l'equivoco, perque tot y con os sieglos d'imposición y d'asimilación espanyolista, conservamos intacta la nuestra identidat propia aragonesa, ferriament mantenida per qui nos precedioron y per los cuals hue creyemos en un Aragón millor, le tot y con qui le pese", subrayoron entre l'acto las organizacions presents "y muitas atras que son dispersas per tot lo territorio aragonés", organizacions, dicioron, que "debemos redoblar los esfuerzos pa mantener viva la flama aragonesista".
"Ye imprescindible que ixa identidat aragonesa propia, este sentir-se y identificar-se con o territorio y las suyas chents, se transmita y se inculque ya en a escuela y, per tanto, vienga reflectada en os materials escolars. Ye inadmisible que lo zaguer currículo aragonés haiga omitiu las particularidaz que conforman la nuestra historia, los nuestros paisaches, la nuestra cultura y economía, en definitiva, nuestro estar y identidat colectiva. Si no femos hincapié en a correcta formación d'a nuestra ciudadanía, la nuestra identidat se diluirá en a todopoderosa hegemonía espanyolista. Frent a tanto desafuero, este ye lo dilema: Aragón u sumisión. Y per ixo exichimos que se reconoixcan los nuestros dreitos historicos y libertaz, que se reconoixca la sobiranía que reside en o lugar aragonés", concluyiba lo manifiesto a lo chilo de: "Entalto Aragón libre, soberano y feminista".
