L’espacio cultural Casa Gastón, situau en a Val d’Echo, ha convocau lo I Premio Nubepensador d’ilustración y cómic, una iniciativa que pretende fer un homenache a la figura d’o poeta, churista y primer Chusticia d’Aragón dimpués d’a suya recuperación democratica, Emilio Gastón. Lo certamen naixe con a vocación de fomentar a creatividat grafica y de mantener vivo lo legau cultural y humanista d’o intelectual aragonés.
A convocatoria ye impulsada conchuntament por Casa Gastón chunto con l’Asociación d’Autors Aragoneses de Cómic (AAAC), amás de contar con a colaboración d’o dibuchant Jesús Lacasa, a investigadora y profesora universitaria Ana Asión y lo Taller d’ilustración y cómic coordinau por Marta Martínez y Josema Carrasco.
Un premio inspirau en lo “nubepensador”
Lo certamen prene lo suyo nombre d’o conceto de “nubepensador”, termin creau por Emilio Gastón ta evocar una mirada reflexiva, imachinativa y compromesa con a realidat. Baixo d’ista ideya central, as obras presentadas habrán de relacionar-se con ixe espiritu creativo y humanista.
A organización ha establiu una serie de criterios ta participar. Os treballos habrán d’estar orichinals y ineditos, y no haber estau presentaus antes a atros concursos. Amás, habrán de respetar a diversidat sexual, funcional y racial y no incluir violencia.
Entre as bases tamién destaca una condición especifica acorde con o espiritu creativo d’o premio: no s’admitirán obras feitas con intelichencia artificial chenerativa.
Plazo y formato de participación
Lo plazo ta ninviar treballos rematará lo 19 d’abril de 2026. O certamen ye ubierto a artistas mayors de 16 anyos, que podrán presentar obras de traza individual u colectiva.
Cada persona participant podrá ninviar un maximo de tres treballos, contando tanto os presentaus individualment como aquells feitos en colaboración con atras personas.
As obras habrán de ninviar-se en formato dichital (PDF u JPG) con resolución de 300 ppp, y podrán estar pachinas de cómic u ilustracions con una grandaria maxima d’A3 más sangrau. En lo caso d’o cómic, a extensión será libre.
Chunto con a obra será necesario adchuntar: una breu sinopsis si se tracta d’un cómic u una explicación breu en lo caso d’ilustracions, os datos personals d’a persona u personas autoras: nombre y apellius, adreza completa, correu electronico, telefono, asinas como anyo y puesto de naxencia. Os treballos habrán de ninviar-se a lo correu electronico: nubepensadores@gmail.com.
Premio y estancia en Casa Gastón
A dotación d’o primer premio consistirá en una obra orichinal procedent d’a colección particular d’Emilio Gastón. Amás, a persona u colectivo ganador será convidau a una estancia d’entre dos y cinco días en Casa Gastón, que podrá disfrutar-se entre os meses de mayo y octubre. O churau tamién podrá reconoixer atros treballos presentaus si considera que reuinen meritos destacaus.
Lo churau d’o certamen estará composau por a poeta y chestionadora cultural M. Carmen Gascón, una persona representant d’a Asociación d’Autors Aragoneses de Cómic, asinas como por Jesús Lacasa y Ana Asión. Lo fallo será inapelable, segunt estableixen as bases d’a convocatoria.
Mantener vivo lo legau d’Emilio Gastón
Con iste nuevo premio, Casa Gastón y as entidatz colaboradoras buscan mantener vivo lo legau cultural d’Emilio Gastón, figura clau en a vida intelectual aragonesa contemporania. Poeta, churista y defensor d’as libertatz civils, Gastón deixó una profunda siñal en a cultura aragonesa y en o pensamiento critico d’o nuestro país.
Lo Premio Nubepensador pretende precisament recoyer ixe espiritu: una invitación a imachinar, reflexionar y creyar dende l’ilustración y o cómic, disciplinas que combinan narrativa, arte y compromiso, con a mirada sobre o mundo dende Aragón.
As bases completas y materials relacionaus con a figura d’Emilio Gastón pueden consultar-se en diversos recursos culturals y audiovisuals disponibles en linia, que afundan en o significau d’o conceto de “nubepensador” y en a trachectoria literaria d’o autor aragonés.
